Мэдыі: Расейскія аэрапорты прызналі, што з'яўляюцца добрай мішэнню для дронаў

Улады РФ не здольныя абараніць гэтыя аб'екты.

Расейскія аэрапорты не могуць абараніцца ад нападаў беспілотнікаў, бо ў краіне няма рэгламентаў для закупу і ўсталявання спецыяльных ахоўных сродкаў, пішуць "Известия" са спасылкай на прадстаўнікоў авіяцыйных вузлоў.

Праблемы з закупам пацвердзілі ў аэрапорце Пензы. У калінінградскім Храброве заявілі, што чакаюць ад Расавіяцыі і Мінтранса рэкамендацый і сэртыфікаванага абсталявання. Ва Унукаве адзначылі, што службы транспартнай і авіяцыйнай бяспекі аэрапорта не могуць займацца супрацьпаветранай абаронай, бо гарантуюць бяспеку на зямлі.

«Рэгіянальныя ўлады цяпер фармуюць штабы, у склад якіх уваходзяць ФСБ, Расгвардыя, іншыя органы. Яны, у сваю чаргу, складаюць спісы крытычна важнай інфраструктуры, якая ў абавязковым парадку падлягае абсталяванню сродкамі барацьбы ад БЛА. Напрыклад, аэрапортаў. Аператары ж авіявузлоў кажуць, што яны не маюць ніякага прадпісання аб магчымасці ўжыць той або іншы сродак», - растлумачыў сітуацыю Андрэй Клюеў, генеральны дырэктар кампаніі «Юмірс», якая вырабляе цывільныя антыдронавыя комплексы.

Паводле ягоных слоў, для пачатку закупак адпаведнага абсталявання аэрапортам неабходны цыркуляр ад Расавіяцыі, які пацвердзіць сумяшчальнасць ахоўных комплексаў з сістэмамі Дзяржаўнай карпарацыі паводле АрПР (нацыянальнага правайдэра аэранавігацыі ў Расеі).

Аэрапорты запытваюць у Расавіяцыі тлумачэнні, якімі сродкамі яны могуць змагацца з дронамі, пацвердзіў начальнік акрэдытацыі падраздзяленняў транспартнай бяспекі профільнай управы ўстановы Аляксандр Сеўрукоў.

«На сённяшні момант наша ўправа мае пазіцыю, што мы б не сталі надаваць паўнамоцтвы ў выяўленні і барацьбе з БЛА падраздзяленням транспартнай бяспекі авіявузлоў. Мабыць, гэта будзе нейкая ўжо існая структура ў аэрапорце - напрыклад, якая займаецца лакацыяй», - адзначыў ён.

Але каб сістэма абароны пачала дзейнічаць, неабходна ўнесці змены ў закон "Аб транспартнай бяспецы", у пастанову ўрада нумар 969 (аб сэртыфікацыі сродкаў гарантавання транспартнай бяспекі) ды іншыя нарматыўныя акты, падкрэсліў Сеўрукоў.

Аднак аэрапорты змогуць змагацца не з усімі дронамі. У Расавіяцыі падзялілі беспілотнікі на тры групы: ракетнага тыпу, самалётнага і мультыротарныя.

«Спецыялісты, якія знаходзяцца ў аэрапортах і ажыццяўляюць іх ахову, змогуць змагацца з беспілотнікамі толькі мультыротарнага тыпу. Гэта звычайныя дроны масай, мабыць, да 30 кг або ў гэтых межах. Перахоп і знішчэнне іншых БЛА - задача ўзброеных органаў. Барацьба з імі сіламі аэрапортавых структур проста бескарысная», - кажа Сеўрукоў. Паводле ягоных слоў, для гэтага патрэбны зенітна-ракетныя сістэмы.

Цывільныя антыдронавыя комплексы таксама абмежаваныя ў сродках, прызнае Клюеў. Паводле ягоных слоў, яны могуць здушыць сігнал беспілотніка, але не могуць прымусіць яго сесці. Таму дрон завісае ў паветры і зносіцца ветрам, пакуль у яго не высяляцца акумулятары. Толькі пасля гэтага ўмыкаецца алгарытм бяспечнай пасадкі, растлумачыў Клюеў.

Ёсць і праблемы з ужываннем стралковай зброі супраць дронаў, бо пры падзенні яны могуць прычыніць шкоду, кажа старшыня ўправы Асацыяцыі малых авіяцыйных прадпрыемстваў Сяргей Дзецяняшоў. Паводле ягонай ацэнкі, арганізацыя аднаго антыдроннага пункту можа каштаваць аэрапорту суму ад 5 да 25 млн руб. Таму яго ўсталяванне мае быць абумоўленае "фактычнай неабходнасцю".