Лаўроў не ўгаварыў Бурундзі падтрымаць вайну ва Украіне

Улады Бурундзі пастанавілі захаваць нейтральную пазіцыю.

Улады Бурундзі наважылі захаваць нейтральную пазіцыю ў дачыненні да вайны ва Украіне пасля візіту ў краіну расейскага міністра замежных спраў Сяргея Лаўрова. Пра гэта паведамляе The East African.

«Бурундзі пастанавіла быць на баку развязання, а не на баку праблем… Бурундзі, як і кожная іншая краіна, суверэнная, і мы выбіраем партнёраў у інтарэсах нашага народа», — заявіў міністр замежных спраў Альберт Шынгіра пасля закрытай сустрэчы з Лаўровым.

Кіраўнік МЗС Бурундзі заклікаў Маскву і Кіеў як мага хутчэй сесці за стол перамоваў. «Усе краіны свету - нашы сябры», - адзначыў пры гэтым Шынгіра.

Лаўроў стаў першай высокапастаўленай асобай з Расеі, якая наведала Бурундзі за 60 гадоў. Яго візіт прайшоў на фоне кампаніі па пашырэнні ўплыву ў Афрыцы, якая запусцілася ў РФ. Пасля таго, як РФ адрэзалі ад Захаду санкцыі, Масква ўзмацніла дыпламатычную працу ў іншых рэгіёнах, асабліва ў Афрыцы і Азіі, зазначае The East African.

Раней, у панядзелак, Лаўроў наведаў Кенію, дзе сустрэўся асобна з прэзідэнтам Уільямам Рута, спікерам Нацыянальнай асамблеі Мазэсам Ветангула і міністрам замежных спраў Альфрэдам Мутуа. Яго візіт рушыў услед за паездкай міністра замежных спраў Украіны Дзмітрыя Кулебы ў Афрыку, дзе ён прадставіў план мірнага ўрэгулявання з дзесяці пунктаў.

З пачатку вайны Лаўроў ужо чатыры разы пабываў у Афрыцы. Ён наведваў ПАР, Эсваціні, Анголу, Эрытрэю, Малі, Маўрытанію, Судан і іншыя краіны кантынента. У сваіх турнэ расейскі дыпламат прапаноўваў афрыканскім дзяржавам расейскія нафтапрадукты і зброю, якія трапілі пад эмбарга, а таксама крытыкаваў Захад за «каланіяльную палітыку».

Афрыканскія краіны імкнуцца захоўваць нейтралітэт у расейска-ўкраінскім канфлікце. Многія з іх адмаўляюцца асудзіць расейскае ўварванне і нават галасаваць супраць Масквы на пасяджэннях Генеральнай Асамблеі ААН і Рады Бяспекі ААН. Аднак некаторыя дзяржавы кантынента надаюць падтрымку Украіне. Так, Марока пагадзілася паставіць Кіеву запчасткі для танкаў Т-72, паведамляла французскае выданне Africa Intelligence.