Як лукашысты спрабуюць утрымаць «мазгі» ў краіне

З 2020 года "уцечка мазгоў" не зніжаецца.

На працягу трох гадоў пасля масавых пратэстаў "уцечка мазгоў" з Беларусі практычна не зніжаецца. Нядзіўна, не толькі таму што працягваюцца рэпрэсіі, але і з эканамічных прычын: заробкі адносна коштаў значна ўпалі. Напрыклад, апошнія "разлікі" паказалі, што на прадпрыемстве "Гродна Азот" лекар вышэйшай катэгорыяй у мясцовай паліклініцы зарабляе столькі ж, колькі і апаратчык самага нізкага, чацвёртага, разраду. Натуральна, што ў такой сітуацыі любы лекар, які адвучыўся 7 гадоў ва ўніверсітэце, будзе шукаць лепшы заробак і нармальныя ўмовы працы. Дзе, прынамсі, ты не будзеш баяцца прыходу ў кабінет КДБшніка, які хоча з табой пагутарыць на адпаведнасць займанай пасады.

Аднак лукашысты, назіраючы вялізны адток найкаштоўнейшых кадраў, знайшлі спосаб утрымаць мазгі ў краіне. Ну, як знайшлі, гісторыя мінулага дапамагла ім звярнуцца да знаёмага ўсім прыгоннага права. Ім вельмі добра вядома, што такое "ўцечка мазгоў", бо ўзяўшы ў палон значную частку інтэлігенцыі, іншая частка ўпэўнена пачала з'яжджаць у Еўропу, каб пазбегнуць рэпрэсій. І паколькі медыкі — адна з самых запатрабаваных прафесій, то пад эксперымент яны трапілі першымі. Урад Беларусі выдаў новую рэдакцыю закона "Аб ахове здароўя", дзе істотна павялічыла тэрміны, якія студэнты будуць абавязаны адпрацоўваць пасля заканчэння ардынатуры. Калі сцісла, то зараз усіх будуць размяркоўваць па-за залежнасцю ад формы навучання. Калі, напрыклад, ардынатары-завочнікі не былі абавязаныя адпрацоўваць, то з новым законам яны могуць патрапіць у пастку на больш за 5 гадоў. А улічваючы тое, што для лекараў-беларусаў цяпер платнай ардынатуры не будзе — толькі бюджэтная, атрымліваецца, што, паступаючы туды, ці то на дзённую ці завочную форму, спецыялісты звязваюць сябе абавязаннямі на 7-10 гадоў.

Ну, і трэба ўлічыць штрафы. Бо зараз усе абавязаны вучыцца ў ардынатуры ў добраахвотна-прымусовай форме, трэба зрабіць усё, каб медыку было немагчыма збегчы. Такім чынам ахвочыя пайсці павінны будуць вярнуць сродкі, затрачаныя на іх падрыхтоўку, з прымяненнем каэфіцыента 2,5. Гэта значыць, за кожную бюджэтную 1000 рублёў лекару давядзецца аддаць 2500.

Ужо зараз гэты жэст лукашыстаў паставіў пад сумненне жаданне паступаць у медычныя ўніверсітэты. Прычым нават нягледзячы на тое, што канец навучальнага года і вось-вось пачнецца ўступная кампанія. У аднаго майго калегі старэйшая дачка з 8 класа была нацэленая на медычны ўніверсітэт, бясконца займалася з рэпетытарамі, вывучала велізарную колькасць медыцынскіх даведнікаў, але зараз, у канцы навучальнага года, рэзка перадумала. Я ўпэўнены, што такіх, як яна, ужо тысячы.

Дарэчы, усе гэтыя гады пасля "выбараў" мы штогод назіраем недаборы практычна ва ўсіх ВНУ Беларусі. Не справіўшыся з адтокам кадраў, спробай "увесці прыгоннае права", лукашысты капаюць сабе яму яшчэ глыбейшую на доўгія гады, знішчыўшы цікавасць у абітурыентаў да вучобы. Гэта значыць спрабавалі ўтрымаць працоўных - страцілі студэнтаў. А на пенсію людзі сыходзяць штогод - хутка замяшчаць не будзе кім.

Вельмі шкада, што ўлада нашай краіны ў 1994 годзе выпадковым чынам патрапіла ў рукі злачынцу, які за 29 гадоў знішчыў усё, да чаго дакрануўся. Цяпер найразумнейшыя людзі нашай краіны вымушаныя ці шукаць сабе прытулак у іншай краіне, дзе будуць сумленна і годна працаваць, ці быць у палоне ў рэжыму. Бо вялізная колькасць палітвязняў усё яшчэ знаходзіцца ў турмах, а гэта педагогі вышэйшай катэгорыі, вынаходнікі, праграмісты і медыкі. Людзі, не толькі з высокім IQ, але і з гонарам, уласцівым патрыётам Беларусі.

Арцём Чэрнікаў, спецыяльна для Telegram-канала «Баста!»