Бакіеву, які хаваецца ў Беларусі, вынеслі новы прысуд

Збеглага экс-прэзідэнта Кыргызстана асудзілі яшчэ на 10 гадоў пазбаўлення волі.

Збеглага прэзідэнта Кыргызстана Курманбека Бакіева завочна прысудзілі яшчэ да 10 гадоў пазбаўлення волі адпаведна з ч.2 арт.336 КК КР (Карупцыя). Вырак абвясціў Першамайскі раённы суд горада Бішкека, піша Tazabek.

«Яму прызначанае пакаранне ў выглядзе пазбаўлення волі тэрмінам на 10 (дзесяць) гадоў з канфіскацый маёмасці, з пазбаўленнем права займаць дзяржаўныя пасады тэрмінам на тры гады», - піша рэсурс.

Шляхам частковага складання пакарання канчаткова ён прыгавораны да 30 гадоў калоніі строгага рэжыму з канфіскацый маёмасці, з пазбаўленнем права займаць дзяржаўныя пасады тэрмінам на тры гады.

Справа звязаная з золатарудным радовішчам Кумтор. Следства мяркуе, што былыя кіраўнікі краіны падпісалі нявыгадныя для Кыргызстана дамовы з канадскімі кампаніямі.

Нагадаем, пасля красавіцкіх падзей 2010 года Курманбек Бакіеў уцёк з Кыргызстана і на запрашэнне Лукашэнкі ўладкаваўся ў Беларусі. Кыргызстан абвясціў яго ў вышук.