У Баранавічах перамалявалі дзіцячую сацрэкламу на будынку ў парку: заходніх мульцяшак замянілі савецкімі
29- 13.06.2023, 21:22
- 10,342
Фотафакт.
Летась фасад газаразмеркавальнай падстанцыі ў маладым парку Баранавічаў абнавілі: на сцены нанеслі яркія памяткі аб паводзінах дзяцей і дарослых у побыце пры выяўленні паху газу. Тады былі намаляваныя героі папулярных у дзяцей відэагульняў. На днях жыхары горада заўважылі, што замежных персанажаў "імпартазамясцілі". Пра гэта расказала выданне Bar24.
Цяпер на сценах будынка з'явіліся новыя персанажы: замест Хагі Вагі і Сірэнагалавога фасад упрыгожваюць Нязнайка, Карлсан і Воўчык з савецкіх мультфільмаў.
Нагадаем, раней на заходніх мультыплікацыйных персанажаў увагу звярнулі беларускія "турба-патрыёты". Яны заклікалі ўлады выключыць "прапаганду заходніх каштоўнасцяў", якія "супярэчаць традыцыям беларускага народа". Савет міністраў з імі пагадзіўся.
У выніку ва ўстановы адукацыі разаслалі ліст з патрабаваннем ужыць "вычарпальныя захады для недапушчэння прапаганды правядзення мерапрыемстваў… супярэчных традыцыйным каштоўнасцям беларускага народу". А менавіта – не дапускаць святкавання ў дзіцячых садах, школах і каледжах Хэлоўіна, з'яўлення на навагодніх і іншых мерапрыемствах касцюмаваных герояў "хагі-вагі і да іх падобных".