«Наша Ніва»: Лекарка, якая працавала ў шклоўскай калоніі на момант смерці Вітольда Ашурка, звольнілася

Наталля Дабрадзеравец звольнілася яшчэ ў траўні.

Лекарка шклоўскай калоніі № 17 Наталля Дабрадзеравец звольнілася ў траўні, піша «Наша Ніва». У гэтай папраўчай установе ў 2021 годзе памёр палітвязень Вітольд Ашурак.

Дзе цяпер працуе Дабрадзеравец, невядома. Як паведамляе выданне, яе муж Сяргей Карчэўскі прадаўжае працаваць у калоніі кіраўніком рэжымнай часткі.

Раней «Альянс расследавальнікаў Беларусі» апублікаваў запіс тэлефоннай размовы ад 2021 года. Праект сцвярджаў, што жаночы голас на запісе належаў Наталлі Дабрадзеравец, а мужчынскі – палкоўніку міліцыі Аляксандру Казлову. Падчас размовы тагачасная кіраўніца медыцынскай часткі шклоўскай калоніі прасіла перавесці яе разам з мужам на іншае месца службы. Жанчына абгрунтавала сваю просьбу «сапраўднай недарэчнасцю, якая адбылася з гэтым палітвязнем», маючы на ўвазе смерць Вітольда Ашурка.

«Сітуацыя становіцца настолькі складанай, што нам з Сяргеем, хутчэй за ўсё, давядзецца звольніцца. У сутнасці, адбылася сапраўдная недарэчнасць, аднак гэтая сітуацыя можа пагражаць мне поўным п****** (канцом. – Заўв. рэд.), калі я застануся. Ды і не факт, што мяне адпусцяць, Шклоў – такі аб'ект, што хрэн адпусцяць. У нас якраз ідзе праверка датычна гэтага палітвязня, і я вельмі спадзяюся, што ўсё ў выніку атрымаецца загладзіць», – сказаў жаночы голас.

Нагадаем, Вітольд Ашурак – актывіст з Бярозаўкі і сябра партыі БНФ. Яго затрымалі ў верасні 2020 года, пасля асудзілі да пяці гадоў зняволення за ўдзел у акцыях пратэсту. Пакаранне ён адбываў у шклоўскай калоніі. 21 траўня 2021 года Ашурак памёр за кратамі пры нявысветленых абставінах. Крымінальную справу паводле гэтага факта заводзіць не сталі. Паводле афіцыйнай версіі, ён памёр ад спынення сэрца. Родныя і паплечнікі палітвязня перакананыя ў гвалтоўным характары ягонай смерці.