На большай частцы Беларусі ўвялі забароны і абмежаванні на наведванне лясоў
3- 17.06.2023, 21:19
- 2,650
Усё праз спякоту.
Забарона і абмежаванні на наведванне лясоў уведзены ў 92 раёнах Беларусі - гэта большая частка краіны, інфармуе Мінлясгас.
Калі вы сабраліся ў выходныя выехаць на прыроду, прыміце да ўвагі, што некаторыя лясы праз спякоту наведваць нельга. Вось якая сітуацыя з забаронамі і абмежаваннямі на сёння (улічыце, што звесткі ўвесь час абнаўляюцца):
Віцебская вобласць: нельга наведваць лясы на ўсёй тэрыторыі.
Магілёўская вобласць: забарона на наведванне лясоў уведзеная ў большасці раёнаў рэгіёну. Абмежаванні ёсць у васьмі раёнах вобласці: Горацкім, Дрыбінскім, Крычаўскім, Клімавіцкім, Касцюковіцкім, Краснапольскім, Мсціслаўскім і Хоцімскім.
Менская вобласць: у 14 раёнах вобласці хадзіць у лес нельга, у тым ліку і ў Менскім. Абмежаванні ўведзены ў Барысаўскім, Капыльскім, Клецкім, Любанскім, Нясвіжскім, Салігорскім, Слуцкім і Стаўбцоўскім раёнах.
Гомельская вобласць: наведваць лясы ў большасці раёнаў можна з абмежаваннямі. Забарона на наведванне ўведзеная Светлагорскім, Жлобінскім і Рагачоўскім раёнах.
Гарадзенская вобласць: забарона на наведванне лясоў уведзеная ў Гарадзенскім раёне, астатнія раёны рэгіёна зялёныя - гэта азначае, што ў лес там можна хадзіць.
Берасцейская вобласць: у большасці раёнаў лесу можна наведваць свабодна. Выключэнне - Лунінецкі, Столінскі і Драгічынскі раёны, там наведванне лясоў абмежаванае.