Блеф Пуціна раскрыты

ЗША кінулі новы выклік кіраўніку Крамля.

Уладзімір Пуцін неаднаразова перасцерагаў ЗША і ЕЗ ад ваеннай дапамогі Украіне. Заходнія журналісты правялі аналіз і высветлілі, чаму Джо Байдэн працягвае кідаць выклік прэзідэнту Расеі, піша The Washington Post.

Прэзідэнт Расеі спрабаваў запалохваць заходніх партнёраў Украіны неаднаразовымі апакаліптычнымі папярэджаннямі. Аднак амерыканскі лідар іх праігнараваў. У якасці прыкладу варта ўспомніць жаданне прэзідэнта ЗША дапамагчы УСУ атрымаць знішчальнікі F-16.

Прэзідэнт ЗША працягвае пашыраць межы цярпення расейскага дыктатара і дэманструе жаданне і надалей пераступаць яго «чырвоныя лініі». Неназваныя амерыканскія чыноўнікі тлумачаць такія паводзіны Байдэна дынамікай, якую Пуцін дэманстраваў з першых дзён поўнамаштабнага ўварвання ва Украіну.

Прэзідэнт Расеі пагражаў пакараць Захад за пастаўку зброі Украіне, але не выканаў ніводнага абяцання. ЗША і Еўропа раскрылі ягоны блеф і зразумелі, што змогуць падтрымліваць Кіеў без сур'ёзных наступстваў. Паводзіны Масквы нават паўплывалі на разлік рызык дзяржсакратара Энтані Блінкена. Ён заахвочваў адміністрацыю прэзідэнта ЗША і саюзнікаў Вашынгтона мацней падтрымліваць Украіну. Таксама на рашучасць Вашынгтона паўплывала здольнасць Украіны абараняць сябе і адваёўваць часова акупаваныя Расеяй тэрыторыі.

Аднак Байдэну і яго дарадцам усё адно даводзіцца ацэньваць рызыкі эскалацыі. Кіраванне гэтымі працэсамі застаецца адным з найскладанейшых аспектаў вайны для адміністрацыі прэзідэнта ЗША.

Крыніца WP заявіла, што амерыканскія партнёры Кіева ў прыняцці пастаноў у пастаўцы зброі арыентуюцца на 4 чыннікі:

ці трэба гэта Украіне;

ці змогуць украінцы гэтым карыстацца;

ці ёсць гэта ў ЗША;

якім будзе адказ Расеі.

Чаму Пуцін блефуе

Амерыканскія чыноўнікі мяркуюць, што расейскі дыктатар не адпомсціў Захаду з-за стану свайго войска. Акупанты страцілі ва Украіне блізу 250 тысяч салдат забітымі і параненымі. Гэтая лічба ашаламляльная для ўсялякага ваеннага канфлікту.

Пуцін паспрабаваў замяніць страты рэзервістамі. Аднак у іх слабая дысцыпліна, дрэнная падрыхтоўка і няякасная экіпіроўка. У матэрыяле адзначаецца, што пакуль застаецца незразумелым пытанне, ці будзе расейскі дыктатар і надалей дазваляць Захаду бяскарна ігнараваць свае пагрозы.