Блінкен: ЗША дапамогуць Украіне пабудаваць войска будучыні

Чальцы NATO абвесцяць аб новым магутным пакеце вайсковай дапамогі Украіне падчас саміту ў Вільні.

Злучаныя Штаты Амерыкі дапамогуць Украіне пабудаваць «войска будучыні». Размова ідзе аб сучасных вайскова-паветраных сілах, узбраенні і іншым. Пра гэта паведамляе РБК-Украіна са спасылкай на словы дзяржаўнага сакратара ЗША Энтані Блінкена падчас візіту ў Фінляндыю.

Са слоў Блінкена, перадумовай да перамоваў Кіева і Крамля з'яўляецца моцная Украіна, здольная стрымліваць і абараняць сябе ад усякай агрэсіі. Таксама ён дадаў, што інвестыцыі ў моц Украіны не шкодзяць дыпламатыі, а наадварот - пракладаюць да яе шлях.

Кіраўнік Дзярждэпа адзначыў, што ЗША дапамогуць стварыць «украінскія Узброеныя сілы будучыні».

- Гэта азначае - сучасныя вайскова-паветраныя сілы, інтэграваную супрацьпаветраную і супрацьракетную абарону, сучасныя танкі і бронемашыны, нацыянальны патэнцыял для вытворчасці боепрыпасаў, а таксама навучанне і падтрымку для ўмацавання баявой гатоўнасці сіл і тэхнікі, - растлумачыў Блінкен.

Расейскае ўварванне - прыклад правалу

Як адзначыў Блінкен, Расея зараз знаходзіцца ў горшым становішчы, чым да пачатку поўнамаштабнага ўварвання. Расейскі дыктатар Уладзімір Пуцін паказаў слабасць ва ўсіх сваіх планах.

- Калі вы глядзіце на доўгатэрміновыя стратэгічныя мэты і задачы прэзідэнта Пуціна, няма ніякіх сумневаў: Расея сёння ў значна горшым становішчы, чым да поўнамаштабнага ўварвання. Там, дзе Пуцін імкнуўся праецыраваць сілу, ён паказаў слабасць. Там, дзе ён планаваў падзяліць, ён аб'яднаў, - дадаў дзяржсакратар ЗША.

Саміт у Вільні і новая дапамога

Чальцы NATO плануюць абвясціць аб новым магутным пакеце вайсковай дапамогі Украіне падчас саміту Альянсу, які пройдзе ў Вільні 11-12 ліпеня.

Як адзначыў Блінкен, хаўруснікі падтрымліваюць абавязацельствы, узятыя на сябе падчас Бухарэсцкага саміту NATO ў 2008 годзе, калі паабяцалі Кіеву чаленства ў Альянсе. З яго слоў, асноўная ўвага сёння ўдзяляецца ўмацаванню стасункаў Украіны і NATO, а таксама прывядзенню нашай краіны да стандартаў апошняга.

Варта дадаць, што Кіеў, са свайго боку, чакае пачуць на саміце пэўныя дамоўленасці наконт гарантый бяспекі на фоне вайны.