ВВС: Новы метад выяўлення раку па аналізе крыві дае добрыя вынікі

Навукоўцы заяўляюць, што два з трох дыягназаў дакладныя.

Выпрабаванні метаду дыягностыкі раку з дапамогай аналізу крыві паказалі шматабяцаючыя вынікі, паведаміла ВВС каманда брытанскіх і амерыканскіх навукоўцаў, якія працуюць над праектам.

Аб новай распрацоўцы было абвешчана вясной 2020 года. З дапамогай простага аналізу крыві навукоўцы спадзяюцца выяўляць больш за 50 відаў анкалагічных захворванняў на ранніх стадыях, яшчэ да з'яўлення сімптомаў.

Маштабныя выпрабаванні пачаліся ў 2021 годзе ў Брытаніі і ЗША. Брытанскія навукоўцы паведамляюць, што сярод пяці тысяч чалавек, якія назіраліся ў лекараў агульнай практыкі з падазрэннем на сімптомы ў Англіі і Уэльсе, тэст беспамылкова выявіў рак у кожных двух выпадках з трох.

У 85% выпадкаў ён таксама правільна вызначыў лакалізацыю пухліны.

Механізм тэсту, якому далі назву «Галерэя», палягае ў тым, што ён шукае прыкметы хімічных змен, якія трапляюць з пухліны ў кроў, у генетычным кодзе - ДНК.

Навукоўцы падкрэсліваюць, што праца над методыкай далёкая ад заканчэння, але ўжо пасля першай стадыі выпрабаванняў можна сцвярджаць, што колькасць выратаваных пацыентаў узрасце.

Тэст таксама зніме нагрузку на сістэмы аховы здароўя краін, у якіх ён будзе практыкавацца.

Да прыкладу, кажуць навукоўцы Оксфардскага ўніверсітэта, цяпер пацыент, які звярнуўся да лекара з такім сімптомам, як страта вагі, павінен прайсці комплекснае абследаванне і здаць цэлы шэраг аналізаў для вызначэння чыннікаў яго стану.

Навукоўцы спадзяюцца, што неўзабаве з дапамогай «Галерэі» можна будзе хутка выключыць самую небяспечную прычыну.

Хоць цяпер адмоўны вынік аналізу не з'яўляецца стоадсоткавай гарантыяй адсутнасці ў арганізме захворвання: у 2,5% удзельнікаў выпрабаванняў з сімптомамі, чые тэсты не выявілі наяўнасць раку, ён быў пасля выяўлены з дапамогай традыцыйных метадаў дыягностыкі - сканаў і біяпсіі.

Ліквідацыю гэтай хібнасці распрацоўшчыкі «Галерэі» называюць сваім прыярытэтам у далейшай працы над праектам.

Тысячы выратаваных жыццяў

Тэст асабліва эфектыўны пры выяўленні відаў раку, якія цяжка дыягнастуюцца, такіх як рак галавы і шыі, кішэчніка, лёгкіх, падстраўнікавай залозы і горла.

Першыя вынікі выпрабаванняў будуць падсумаваныя ў асобнай справаздачы пазней, але ўжо цяпер навукоўцы гавораць аб поспеху.

Сістэма аховы здароўя Вялікай Брытаніі NHS плануе распаўсюдзіць выпрабаванні метаду яшчэ на мільён чалавек у 2024 і 2025 гадах.

- Ранняе выяўленне раку жыццёва важнае, і гэты тэст можа дапамагчы нам злавіць больш ракавых захворванняў на больш ранняй стадыі і дапамагчы выратаваць тысячы жыццяў, - кажа кіраўнік дэпартамента анкалогіі NHS прафесар Пітэр Джонсан.

Распрацоўка метаду і даследаванні праводзяцца групай амерыканскіх навукоўцаў з Інстытута анкалогіі Дана-Фарбер і Гарвардскай медыцынскай школы ў супрацоўніцтве з брытанцамі з Інстытута Фрэнсіса Крыка і Універсітэцкага каледжа Лондана. Іх вынікі апублікаваныя ў акадэмічным часопісе Annals of Oncology выдавецтва Оксфардскага ўніверсітэта.

Праект аплачвае Grail, стартап з Крамянёвай даліны, сярод інвестараў якога – заснавальнік Amazon Джэф Безас.