Расейскія вайскоўцы праводзяць ратацыю сваіх падраздзяленняў у Беларусі

Пра гэта паведамляе Мінабароны Беларусі.

Узброеныя сілы Расеі праводзяць ратацыю сваіх падраздзяленняў, якія дыслакаваныя ў Беларусі ў рамках рэгіянальнай групоўкі войскаў. Пра гэта паведаміла 2 чэрвеня прэс-служба Мінабароны.

Ва ўстанове падкрэслілі, што ў інтарэсах павышэння абароназдольнасці «саюзнай дзяржавы» «прадаўжаецца рэалізацыя мерапрыемстваў для павышэння баявых магчымасцяў злучэнняў і воінскіх часцей на тэрыторыі Беларусі».

Закончаная пастаўка ва Узброеныя сілы Рэспублікі Беларусь з тэрыторыі Расейскай Федэрацыі чарговага камплекту зенітнага ракетнага комплексу С-400. Акрамя таго, праводзіцца планавая ратацыя воінскіх часцей і падраздзяленняў расейскага складальніка рэгіянальнай групоўкі войскаў (сіл).

«На тэрыторыю Рэспублікі Беларусь камбінаваным спосабам прыбываюць асабовы склад, узбраенне і тэхніка са складу агульнавайсковых і танкавых злучэнняў Узброеных сілаў Расейскай Федэрацыі», – адзначылі ў Мінабароны.