У частцы Белгародскай вобласці забаранілі рух цывільнага транспарту

Праз абстрэлы.

Урад Белгародскай вобласці прыняў пастанову перакрыць рух транспарту на некаторых адрэзках дарог паблізу ад Шабекіна. Забарона будзе дзейнічаць да 30 чэрвеня.

Забарона распаўсюджваецца не толькі на рух, але і на стаянку транспартных сродкаў. Гаворка ідзе пра чатыры трасы:

Белгарад – Шабекіна – Валаконаўка (ад Разумнага да Вазнясенаўкі)

Шабекіна – Кароча (ад Вазнясенаўкі да Дзмітрыеўкі)

Шабекіна – Няклюдава – Аляксееўка (ад Шабекіна да Чураева)

Маславая Прыстань – Батрацкая Дача (ад Маславай Прыстані да Паляны)

Аўтобусы, маршрут якіх праходзіў праз Шабекіна, цяпер будуць ісці ў аб'езд праз Новы Аскол і Валаконаўку, а па маршруце № 719 аўтобусы часова перастануць хадзіць. Таксама праз абстрэлы скасаваны прыгарадны цягнік з Белгарада ў Нежагаль.

З 1 чэрвеня Шабекіна церпіць ад масавых абстрэлаў. Губернатар Белгародскай вобласці Вячаслаў Гладкоў паведамляе, што па горадзе выпускаецца некалькі сотняў снарадаў за дзень. Частка насельніцтва пакінула гэты населены пункт, там адзначаныя выпадкі марадзёрства.