Нямеччына разгортвае ЗРК Patriot для абароны саміту NATO

Саміт адбудзецца 11–12 ліпеня.

Нямеччына разгортвае сістэму супрацьпаветранай абароны Patriot у Вільні ў рамках падрыхтоўкі да ліпеньскага саміту NATO, які адбудзецца 11–12 ліпеня.

Пра гэта паведамляе прэс-служба Узброеных сілаў Літвы.

«Месца разгортвання ўкамплектаванае экіпажам Узброеных сілаў Нямеччыны, які забяспечыць бесперабойнае функцыянаванне сістэмы», – гаворыцца ў паведамленні.

Адзначаецца, што сістэма Patriot упершыню выконвае баявыя задачы ў Літве. Акрамя гэтага, напярэдадні саміту будуць разгорнутыя іншыя баявыя сілы і сродкі ў адпаведнасці з загадзя распрацаванымі планамі, працэдурамі, канцэпцыямі сувязі і лагістыкай, для чаго задзейнічаюць больш за тры тысячы вайскоўцаў Літвы.

У час саміту Узброеныя сілы Літвы разам з хаўруснікамі будуць дадаткова забяспечваць супрацьпаветраную абарону, ахову крытычна важных аб'ектаў і маршрутаў, абарону фізічных асобаў, праверку памяшканняў і транспартных сродкаў, а таксама пошук выбуховых рэчываў на аб'ектах.