Лукашэнка: Беларусь не хоча захопліваць Калінінградскую вобласць

Пры гэтым дыктатар назваў Калінінградскую вобласць Расеі «сваёй».

Аляксандр Лукашэнка заявіў аб тым, што Беларусь не мае намеру захопліваць Калінінградскую вобласць РФ.

Прынамсі, падчас сустрэчы з калінінградскім губернатарам Антонам Аліханавым Лукашэнка згадаў аб тым, што палова беларускага ўрада кажа аб тым, наколькі Беларусі блізкая Калінінградская вобласць. А таксама аб тым, наколькі беларускія ўлады зацікаўленыя ў развіцці супрацоўніцтва паміж рэспублікай і гэтым расейскім рэгіёнам.

Таксама Лукашэнка падкрэсліў, што Беларусь і Калінінградскую вобласць звязваюць старажытныя і трывалыя дачыненні ва ўсіх сферах. У тым ліку, эканамічнай, культурнай, навуковай, адукацыйнай, у сферы транзіту, а таксама роднасныя сувязі паміж жыхарамі.

Акрамя таго, у якасці прыкладу Лукашэнка нагадаў аб тым, што Беларусь у Савецкім Саюзе адказвала за Калінінградскую вобласць.

- Ніхто ніколі не падзяляў Беларусь і Калінінградскую вобласць. Гэта, мусіць, натуральна, - заўважыў ён.

І тут жа ён растлумачыў, што зыходзячы з усяго гэта, ён і сам называў Калінінградскую вобласць «сваёй». Хаця падкрэсліў, што Беларусь ніколі не мела намеру завалодаць гэтым рэгіёнам.

- Я яе заўсёды называў «сваёй». Але баяўся, каб расейцы не падумалі, што мы прэтэндуем захапіць Калінінградскую вобласць. Хаця гэта, напэўна, было б не горш, калі б Калінінградская вобласць была бліжэй да Беларусі, - заявіў ён.

І дадаў, паказваючы на расейскага амбасадара Барыса Грызлова, маўляў, дыпламат не чуў гэтых разваг.