Дзяржава адной рукой купіла ў прыватніка электраэнергію, а другой - забрала грошы

Як беларускі бізнэсовец стаў вінаватым.

Магілёўскія энэргетыкі закупілі ў прыватніка электраэнергію з аднаўляльных крыніц. Агульная сума ўгоды перавысіла 15 700 000 рублёў. Аднак гэтая пакупка выклікала пытанні ў пракуратуры, якая праз суд дабілася вяртання гэтых грошай, паведамляе zerkalo.io.

Дзяржпрадпрыемства "Магілёўэнэерга" ў 2022 годзе закупіла ў прыватніка электраэнергію, якую ён вырабляў з аднаўляльных крыніц. З якой канкрэтнай крыніцы, не паведамляецца. Гэта можа быць, да прыкладу, вятрак, сонечная электрастанцыя або гідраэлектрастанцыя. На аплату гэтай электраэнергіі дзяржпрадпрыемства выдаткавала больш за 15,7 млн рублёў.

Гэтая ўгода прыцягнула ўвагу пракуратуры, у выніку «Магілёўэнерга» падало пазоў аб прызнанні нікчэмнасці ўгоды.

"Паколькі заканадаўствам прадугледжанае выключнае права ўласнасці дзяржавы на сістэмаўтваральныя лініі электраперадачы і падстанцыі напружаннем 110 кВ і вышэй, рэгістрацыя права ўласнасці камерцыйнай арганізацыі на збудаванні энэргетыкі праведзена незаконна, так што ТАА "С" не магло з'яўляцца ўласнікам капітальных будынкаў і распараджацца імі", заявілі ў пракуратуры Магілёўскай вобласці.

У выніку пракуратура звярнулася ў эканамічны суд Магілёўскай вобласці, яна патрабавала прызнаць несапраўднай дзяржрэгістрацыю права ўласнасці аб'ектаў энэргетыкі і выкарыстаць наступствы несапраўднасці ўгоды.

Суд стаў на бок пракуратуры і прызнаў угоду нікчэмнай, "з-за адсутнасці ў прыватніка правоў па распараджэнні маёмасцю, якая не належыць яму". Прыватнік мусіць вярнуць грошы.

Пастанова суда набыла моц.

У гэтай гісторыі не ўдакладняецца, чаму ў «Магілёўэнэрга» не ўзніклі пытанні на этапе рэгістрацыі прыватнікам аб'ектаў энэргетыкі і пакупкі ў яго электраэнэргіі.