Палітычную зняволеную Паліну Шарэнду-Панасюк моцна збілі ў калоніі

Адміністрацыя калоніі магла зладзіць правакацыю.

Палітычную зняволеную, актывістку грамадзянскай кампаніі «Еўрапейская Беларусь» Паліну Шарэнду-Панасюк маглі збіць у калоніі перад этапам у псіхіятрычны цэнтр «Навінкі».

Пра гэта сайту Charter97.org паведаміў муж палітычнай зняволенай Андрэй Шарэнда:

- Сёння ананімная крыніца паведаміла праваабарончаму цэнтру «Вясна», што Паліна Шарэнда-Панасюк была моцна збітая ў калоніі № 24 у Зарэччы. Паліна падчас этапавання (гэта было яшчэ 22 чэрвеня) сустрэлася з гэтай дзяўчынай на адным з пунктаў.

Зняволеная бачыла, што ў Паліны моцна збіты твар, у яе былі сінякі, траўма пераносся. Паліна хацела праз яе паведаміць, што супраць яе ў калоніі была ўчыненая правакацыя.

Ці яе падсадзілі, ці да яе падсадзілі жанчын, якія збілі маю жонку ў камеры. Якія фізічныя пашкоджанні яна атрымала — невядома. Да гэтага была інфармацыя, што Паліна менавіта ў гэты час мінімум на дзесяць дзён змяшчалася ў санітарную частку калоніі.

Андрэй Шарэнда расказвае, што менавіта ў перыяд паміж 8 і 20 чэрвеня ад Паліны не было ніякіх навін:

— Мабыць, Паліну сапраўды збілі ў калоніі, шпіталізавалі, а фізічныя пашкоджанні былі значнымі. Бо проста так у санітарную частку не адпраўляюць. Ясна, што за гэтай правакацыяй стаіць адміністрацыя калоніі.

Менавіта ў гэты перыяд Паліна знікла на тры тыдні. Цяпер стала ясна, чаму яе так доўга вазілі, хавалі ад людзей.

Жыццю Паліны пагражае небяспека. Улады робяць усё, каб ціснуць на яе. Я заклікаю ўсе міжнародныя арганізацыі сачыць за лёсам Паліны, сітуацыя з ёй проста катастрафічная.

Адзначу, што два тыдні ад Паліны няма ніякіх навін.

Паліна Шарэнда-Панасюк мела выйсці на волю 6 жніўня, але супраць яе ўжо другі раз распачалі крымінальную справу за «непадпарадкаванне адміністрацыі калоніі». Цяпер Паліне пагражае яшчэ да двух гадоў зняволення. У няволі маці дваіх дзяцей застаецца ад пачатку студзеня 2021 года. Нагадаем, што ў калоніі Паліна Шарэнда-Панасюк адмовілася ад грамадзянства Беларусі.