У Зэльве судзяць мясцовага прадпрымальніка за «абразу» Лукашэнкі

Пакуль мужчына быў у следчым ізалятары, памерла ягоная маці.

У будынку суда Зэльвенскага раёна 28 жніўня пачынаецца крымінальны працэс у дачыненні да Віктара Ламекі. Яго абвінавачваюць паводле двух артыкулаў Крымінальнага кодэкса: ч.2 арт.367 (паклёп у дачыненні да Лукашэнкі) і ч.2 арт.368 (абраза Лукашэнкі), піша “Вясна”.

Прадпрымальнік з Зэльвы, палітычны вязень Віктар Ламека быў жорстка затрыманы 29 сакавіка і збіты пры затрыманні. Першапачаткова на яго склалі пратакол паводле адміністрацыйнага артыкулу 19.11 КоАП РБ (распаўсюджванне экстрэмісцкіх матэрыялаў).

Не даўшы Ламеку нават пакінуць будынак суда, карнікі зноў затрымалі яго і зноў склалі пратакол паводле арт.19.11 КоАП РБ. Калі спадар знаходзіўся ў следчым ізалятары, на яго склалі трэці пратакол.

Пазней стала вядома, што Ламека знаходзіцца ў ізалятары, яму выстаўленае абвінавачанне ўжо паводле крымінальных артыкулаў. Пакуль спадар быў у ізалятары, памерла ягоная маці, піша «Гарадзенская вясна».

Яго ўтрымліваюць у ізалятары места Баранавічаў.

Віктар Ламека вядомы тым, што раней судзіўся з падатковай інспекцыяй і абараняў прадпрымальнікаў з Гарадзеншчыны ў судах рознай інстанцыі.