«У мяне ёсць дакументы аб удзеле Лукашэнкі ў злачынствах супраць Беларусі»

Што было на судзе над экс-спецназаўцам Гараўскім.

У судзе швэйцарскага кантона Санкт-Гален 19 верасня пачаўся суд над экс-байцом беларускага спецыяльнага атрада хуткага рэагавання (САХР) Юрыем Гараўскім. Беларуса судзяць у рамках універсальнай юрысдыкцыі паводле абвінавачання ў датычнасці да выкрадання і забойства палітычных апанентаў Аляксандра Лукашэнкі - былога міністра ўнутраных спраў Беларусі Юрыя Захаранкі, экс-кіраўніка Цэнтрвыбаркама Віктара Ганчара і бізнэсоўца Анатоля Красоўскага. Пра тое, як праходзіла першае паседжанне, перадавала выданне «Новы Час».

Карэспандэнт выдання адзначыў павышаныя захады бяспекі ў судзе. Юрыя Гараўскага даставілі на працэс пад аховай швэйцарскіх спецслужбаў - мікрааўтобус, на якім ён прыбыў, падагналі даслоўна да дзвярэй суда. Сам Гараўскі выйшаў, хаваючы твар пад капюшонам. У будынку суда здымка была забароненая.

Падчас допыту Гараўскі даволі гучна вымавіў, што мае дакументы аб датычнасці вышэйшых службовых асобаў Беларусі да злачынстваў.

- У мяне ў Беларусі засталіся дакументы аб удзеле Паўлічэнкі, Лукашэнкі, Сівакова і Шэймана ў злачынствах супраць Беларусі.

- Дзе знаходзяцца гэтыя дакументы? - удакладніў суддзя.

- У Беларусі. Я не змог іх вывезці.

Ён таксама кажа, што пасля таго як Deutsche Welle выпусціла пра яго фільм, ён пачаў баяцца за сваё жыццё.

- Чаму вы тады здымаліся ў гэтым фільме, ці спрабавалі вы такім чынам націснуць на міграцыйную службу? - спытаў суддзя.

- Я хацеў данесці праўду, нягледзячы на пагрозу ўласнаму жыццю. Я страціў абсалютна ўсё.

Суддзю цікавіла, як і чаму Гараўскі аказаўся ў Швэйцарыі. Падсудны ўхіліўся ад наўпроставага адказу: «Мне сказалі, што мяне адвязуць у Еўропу».

- Хто гэта сказаў? - удакладніў суддзя.

- Мой куратар, - ціха адказаў Гараўскі і выключыў мікрафон.

Суддзя зазначыў, што ў міграцыйнай службе расказу Гараўскага не паверылі і адмовілі яму ў наданні прытулку, і пацікавіўся, што той мае намер рабіць.

- Не ведаю, тэрмін дзеяння пашпарта заканчваецца налета, і дыктатар Лукашэнка забараніў працягваць пашпарт за мяжой, - сказаў той.

Суддзя пацікавіўся, хто можа пацвердзіць, што Гараўскі не знаходзіцца на службе ў спецслужбаў.

- Я не ведаю, хто можа гэта пацвердзіць. Але калі я застануся ў Швэйцарыі, буду працаваць, плаціць падаткі і быць законапаслухмяным грамадзянінам.

Падчас першага судовага паседжання Гараўскі папрасіў прабачэння ў родных выкрадзеных палітыкаў за тое, што ўдзельнічаў у злачынствах, пры гэтым зачытаў словы з паперкі. А на пытанне суддзі аб тым, якое пакаранне ён уважае за справядлівае для сябе, адказаў, што не можа дыктаваць суду.

- Вы ведаеце законы Швэйцарыі і самі прымеце пастанову, - адказаў Гараўскі.

Пракурор палічыў, што ў судзе было прадстаўлена дастаткова довадаў віны Гараўскага і папрасіў прыгаварыць экс-спецназаўца да трох гадоў пазбаўлення волі, два з якіх — умоўна, з выпрабавальным тэрмінам чатыры гады.

Пракурор таксама мяркуе, што Гараўскі не можа быць экстрадаваны ў Беларусь.