Мэдыі: Украінская панцырная тэхніка ўпершыню прарвала і перайшла «лінію Суравікіна»

У прарыў пайшлі панцырныя машыны Stryker, БМП Marder і БТР MaxxPro.

Украінская цяжкая тэхніка ўпершыню пераадолела расейскія ўмацаванні першай «лініі Суравікіна» ля сяла Вярбовага ў Запарожскай вобласці.

Пра гэта пішуць OSINT-аналітыкі, якія робяць выснову з апублікаваных відэа расейскіх атак на ўкраінскую цяжкую тэхніку.

З відэа, якое геалакаваў твітэр-рахунак imi(m), вынікае, што цяжкая тэхніка ўпершыню пераадолела супрацьтранспартны роў і "зубы цмока" на гэтым кірунку, піша Джордж Барос.

Як адзначае вайсковы аналітык Роб Лі, абарончую лінію прайшлі панцырныя машыны Stryker, БМП Marder і БТР MaxxPro.

Барос адзначыў, што ўкраінская тэхніка на відэа, мабыць, ехала прасёлкавай дарогай, якая, відаць, была захаваная пры будаўніцтве рова і пракладанні лініі з "зубамі цмока".

Гэта, напэўна, паказвае на тое, што УСУ маглі распляжыць расейскую абарону на гэтай дзялянцы, дадае эксперт.

Прасоўванне ўкраінскай цяжкай тэхнікі ў гэтым абшары — значнае развіццё сітуацыі на фронце, адзначыў Роб Лі.

Імаверна, украінскія сілы рыхтуюцца да новага наступу, мяркуе Барос.

Украінскія войскі ўпершыню пераадолелі абарончыя збудаванні ля Вярбовага ў канцы жніўня.

На пачатку верасня УСУ здалелі павялічыць пралом у расейскай абароне.