Медсястру з Ваўкавыска судзяць паводле васьмі артыкулаў

У лютым яна вярнулася з Польшчы.

Пракуратура накіравала ў суд крымінальную справу ў дачыненні да дзяўчыны з Ваўкавыска, якую абвінавачваюць у «экстрэмісцкіх» злачынствах паводле васьмі артыкулаў. Відавочна, гаворка ідзе пра Аляксандру Каско, якую затрымалі ў лютым пасля вяртання з Польшчы, паведамляе тэлеграм-канал «Суды і затрыманні. Гродна і вобласць».

Паводле версіі пракуратуры, жыхарка Ваўкавыска «распаўсюджвала інфармацыю што да планавання, арганізацыі, падрыхтоўкі і ўчынення замахаў на асновы канстытуцыйнага ладу і грамадскую бяспеку Рэспублікі Беларусь», а таксама была адміністратаркай «дэструктыўных Telegram-каналаў», дзе «распальвала варажнечу, абражала чыноўнікаў і паклёпнічала на Лукашэнку».

Ёй выставілі абвінавачанне паводле васьмі артыкулаў:

распальванне варожасці (ч.3 арт.130 КК);

стварэнне экстрэмісцкага фармавання (ч.ч.1,2 арт. 361-1);

незаконныя дзеянні ў дачыненні да персанальных звестак (ч.3 арт.203-1 КК);

садзейнічанне экстрэмісцкай дзейнасці (ч.1,2 арт.361-4 КК);

паклёп на Лукашэнку (ч.2 арт.367 КК);

абраза Лукашэнкі (ч.ч.1,2 арт.368 КК);

абраза прадстаўніка ўлады (арт.369 КК);

абраза суддзі (арт.391 КК).

Паводле звестак тэлеграм-канала, размова ідзе аб 31-гадовай Аляксандры Каско, якую ў лютым гэтага года затрымалі на наступны дзень пасля вяртання ў Беларусь з Польшчы.

Нагадаем, 10 лютага суд Ваўкавыскага раёна прысудзіў яе да 10 дзён адміністрацыйнага арышту на падставе ч.2 арт.19.11 КоАП РБ (Распаўсюджванне, выраб, захоўванне інфармацыйнай прадукцыі, якая змяшчае заклікі да экстрэмісцкай дзейнасці або якая прапагандуе такую дзейнасць), аднак пасля гэтага дзяўчына не выйшла на волю.

Як паведамляе MAYDAY, яшчэ да ад'езду з Беларусі Аляксандра неаднаразова зазнавала адміністрацыйны пераслед. Апошні раз яе змяшчалі ў ІЧУ ў лютым 2021 года. Праз прэсінг Каско давялося сысці з працы - яна працавала медсястрой у Ваўкавыскай цэнтральнай раённай лякарні - і пакінуць краіну.

12 верасня КДБ уключыў дзяўчыну ў «тэрарыстычны спіс».