«Наводзіш на поўнач - паказвае захад»

У Расеі запусцілі дзіўнае прыкладанне для барацьбы з беспілотнікамі.

«Агульнарасейскі народны фронт» распрацаваў дадатак, з дапамогай якога грамадзяне могуць перадаць інфармацыю аб беспілотніках, ракетах, выбухах, дыверсантах і розных падазроных асобах.

«Усеагульная пільнасць <…> дазволіць прадухіліць або мінімізаваць наступствы магчымых надзвычайных сітуацый», — гаворыцца ў анатацыі.

Для ідэнтыфікацыі выкарыстоўваецца нумар мабільнага тэлефона. Акрамя таго, праграма запытвае доступ да месцазнаходжання, а таксама да фота, мультымедыя і іншых файлаў на прыладзе. Без гэтых звестак адправіць сігнал немагчыма.

Пры ўваходзе ў дадатак з'яўляецца папярэджанне аб тым, што перадача «фэйкавай» інфармацыі пагражае крымінальнай справай паводле артыкуле 306 КК аб загадзя ілжывым даносе, які прадугледжвае да двух гадоў пазбаўлення волі. Чалавек павінен пацвердзіць, што азнаёмлены з адказнасцю, інакш выкарыстоўваць сервіс нельга.

Каб апавясціць аб небяспецы, неабходна размясціць тэлефон па накіраванні руху аб'екта, выбраць тып пагрозы са спісу і націснуць кнопку «Паведаміць», пасля чаго сігналам зоймуцца спецслужбы («адказныя супрацоўнікі дзяржаўнай улады»).

Паводле інфармацыі Google Play, прыкладанне спампавалі больш за 50 тысяч разоў. Аднак людзі незадаволеныя якасцю сэрвісу і ацэньваюць яго на «тройку». Прынамсі, вельмі шмат водгукаў прысвечаны некарэктнай рабоце компаса. «Наводзіш на поўнач - паказвае захад. У выніку атрымліваецца, што ты перадаеш няправільную інфармацыю», - піша адзін з карыстальнікаў.

«Нічога не працуе: компас паказвае толькі поўнач (калі тэлефон накіраваны на поўнач) або паўночны ўсход у кожных іншых палажэннях тэлефона, а пры выбары ўсякай небяспекі (беспілотнік, ДРГ і інш.) выдае памылку», – гаворыцца ў іншым водгуку. Яшчэ адзін чалавек указаў на завісанне смартфона пры спробе вызначыць кірунак руху і каардынаты аб'екта.

Таксама людзей палохае папярэджанне аб крымінальнай справе за ілжывыя паказанні. «Чалавек спампоўвае дадатак, жадаючы дапамагчы. А яму адразу: «Ты глядзі тут нам! Не ўздумай хуліганіць», - піша адзін з карыстальнікаў, адзначаючы, што праз гэта ён выдаліў праграму.

Прыкладанне было прадэманстраванае 17 жніўня. Мяркуючы з паведамлення АНФ, за месяц яно дапамагло збіць толькі два беспілотнікі над тэрыторыяй Бранскай вобласці.