Мэдыі: Вялікая Брытанія больш за год вяла таемныя перамовы з Расеяй

Названыя месцы, дзе праходзілі сакрэтныя дыпламатычныя сустрэчы.

У апошнія 18 месяцаў брытанскія службоўцы вялі дыпламатычныя перамовы з прадстаўнікамі Крамля наконт глабальнай бяспекі на фоне вайны на тэрыторыі Украіны.

Пра гэта паведамляе Sky News.

Таемныя сустрэчы адбываліся ў розных месцах, такіх як Вена або Нью Ёрк, у рамках закулісных дыпламатычных намаганняў. Абмеркаванні датычыліся праблем бяспекі, якія ўплываюць на Брытанію, а таксама міжнароднае грамадства, у тым ліку дэфіцыт збожжа і ядзерную бяспеку.

Спасылаючыся на газэту «І», адзначаецца, што Брытанія не вяла ніякіх актыўных мірных перамоў, якія былі б накіраваныя на дыпламатычнае ўрэгуляванне вайны на тэрыторыі Украіны. Інфармацыю таксама пацвердзіў высокапастаўлены брытанскі дыпламат, які ўдзельнічаў у паасобных з гэтых сустрэч.

«Мы падтрымліваем кантакт і мяркуем, што вельмі важна падтрымліваць адкрыты дыялог падчас вайны ва Украіне. Мы ніякім чынам не дзелім часткі краіны і не ўкладаем мірныя пагадненні ад нечага імя, але жыццёва важна трымаць гэтую лінію кантакту адкрытай», — дадаў ён.

Прадстаўнік Міністэрства замежных спраў, Супольнасці і развіцця паведаміў газэце "І" аб тым, што сустрэчы з афіцыйнымі асобамі нібыта сапраўды адбываліся, аднак толькі тады, калі яны былі "абсалютна неабходнымі". Сярод іншага ён адпрэчыў усякія сцвярджэнні аб тым, што дыскусіі тычыліся перамоў аб спыненні вайны на тэрыторыі Украіны.