Фотафакт: Каля менскага офіса МАПІДа з пятніцы стаіць чарга

Сёння ў «Англійскім квартале» пачалі прадаваць кватэры.

«Англійскі квартал», які вырас у Малінаўцы намаганнямі МАПІДа, упершыню зацікавіў менчукоў яшчэ ў 2020 годзе, калі былі дабудаваны першыя трохпавярховыя дамы. Нетыповы «спальнік» нібы быў створаны для людзей, якія мараць пра камфорт і спакой, але не гатовыя раскашэльвацца на таунхаусы ў «Зялёнай гавані».

Вядома, не абышлося і без праблем - у некаторых кватэрах прамярзалі сцены. Забудоўшчык улічыў памылкі і два наступныя дамы будааў ужо паводле новага праекту.

Сёння ў іх пачалі прадаваць кватэры для ўсіх ахвочых. Нягледзячы на не самы нізкі кошт «квадрата» (ад $1424), ужо ў пятніцу ў офіса МАПІДа пачала фармавацца чарга па жыллё, піша «Онлайнер».

На якія кватэрыпаляванне?

Будынкі, элегантна «загрымаваныя» пад лонданскія таунхаусы, выраслі на вуліцы Ясеніна. У кожным - па 4 пад'езды і 43 кватэры. Чыставое аздабленне дасталася толькі некалькім кватэрам - у далейшым іх перададуць гараджанам, чые дамы ідуць пад руйнаванне. Тамака ўжо паклеены шпалеры, засланы лінолеум. У абавязковы набор уваходзяць сантэхніка, электрапліта, ракавіна на кухні. А вось жыллё, якое павінна паступіць у свабодны продаж, ідзе з чарнавым аздабленнем.

Самыя прасторныя кватэры, чатырохпакаёвыя, знаходзяцца на першых паверхах. Іх агульная плошча - 99 "квадратаў". Сюды ўключана яшчэ і дадатковае месца захоўвання - так званая халодная камора глыбінёй 3 метры. Патрапіць у яе можна з лоджыі. Гэты фармат жылля рэалізуюць праз аўкцыён. Пачатковы кошт квадратнага метра - 4095 рублёў ($1261).

На іншых узроўнях размяшчаюцца траячкі (76-78 «квадратаў»), двойкі (58-60) і аднапакаёўкі (40-44). Столі невысокія - 2,54 метра. Планіроўкі наступнага тыпу: жылыя пакоі ізаляваныя, кухні ў асноўным злучаныя з гасцёўнямі. Санвузлы, як правіла, паасобныя, сумешчаныя ёсць толькі ў аднапакаёўках.

Што тычыцца коштаў, то кошт «квадрата» у аднапакаёўках - 4740 рублёў (або $1460 паводле курсу), у двойках– 4 725 рублёў (прыкладна $1455), у тройках - 4625 рублёў ($1424).

Пятнічная чарга

Інтуіцыя падказвала, што чарга за кватэрамі ў «Ангельскім квартале» можа з'явіцца задоўга да афіцыйнага старту продажаў у панядзелак. І яно журналістаў не падвяло: ужо ў пятніцу ўвечары на паркоўцы перад офісам МАПІДа было заўважана некалькі аўтамабіляў. Вакол іх пераступалі з нагі на нагу чалавек дзесяць. Хтосьці прадбачліва ўзяў з сабой складное крэсла і таму адчуваў сябе камфортней у параўнанні з іншымі. Хтосьці прывалок цэлы чамадан з арсеналам усяго самага неабходнага: ад пледа да планшэта. Увогуле, настрой у прысутных быў рашучы.

- З раніцы было 1-2 чалавекі, астатнія падцягнуліся да абеду, - успомніла жанчына з нататнікам у руках. - Мы ведаем адзін аднаго яшчэ з першага прагляду (забудоўшчык прапаноўваў экскурсіі па дамах для тых, хто зацікавіўся. - Заўвага.). Касцяк сфармаваўся яшчэ ў аўторак - тут людзі, якія рэальна хочуць кватэры ў «Англійскім квартале». Добрая кампанія, выдатна бавім час.

У пятніцу ў спісах быў 21 чалавек. Кожны нагледзеў сабе нешта сваё і перажываў, каб запаветная аднапакаёўка/двойка/тройка не дасталася камусьці іншаму. Усё ж дакладную колькасць кватэр, з якімі гатовы расстацца забудоўшчык гэтым разам, нікому з прысутных не вядомая.

- А раптам самы сціплы і непрыкметны чалавек з чаргі зойдзе і купіць сабе 7-8 найлепшых кватэр? Мы ж не ведаем, у каго якія намеры, - слушна заўважыў мужчына ў чорным.

«Чаргавікі» называюць сябе людзьмі, якія шануюць камфорт і стаяць тут далёка не з-за «смачнага» кошту, а з-за магчымасці выбару. Большасць - жыхары Малінаўкі, якія звыклі да гэтага раёна. Хаця знайшліся паляўнічыя нават з іншых гарадоў — з Магілёва, напрыклад. Праўда, пагутарыць з гэтай сям'ёй нам не ўдалося - яны акурат з'ехалі перакусіць.

- Будзем дзяжурыць усе разам, вось так стаяць адзін за адным, - як бы з выклікам заявіла нам жанчына з тэчкай (магчыма, так яна спрабавала праз журналістаў націснуць на гіпатэтычных канкурэнтаў, якія яшчэ сюды не даехалі, - маўляў, нават не лезьце, у нас ужо ўсё распісана).

І ўсё ж чым прысутных так прывабіла стварэнне МАПІДа? Бо ў чарзе ёсць і тыя, хто ўжо купіў жыллё ў першых дамах квартала, а зараз прыглядае яшчэ адно - ужо для сваякоў.

- Малапавярховая забудова, мінімум суседзяў. Усё ціха, спакойна. Для кожнай кватэры прадугледжана парковачнае месца. Ёсць уся інфраструктура: крамы, паліклініка, школа, дзіцячы садок. Да метро можна пешшу прайсціся… – пералічыў гараджанін у блакітнай футболцы.

- Калі хочацца, падабаецца, трэба браць, ну а што? - падтакнуў яму другі.

І з ім складана не пагадзіцца.