Віцебскі суд прысудзіў відааператара Вячаслава Лазарава да 5,5 гадоў

Ягоную жонку - да трох.

25 верасня палітвязням мужу і жонцы Вячаславу Лазараву і Таццяне Пыцько быў вынесены прысуд - 5 з паловай і 3 гады зняволення адпаведна, паведамляе «Беларуская асацыяцыя журналістаў».

Вячаслаў будзе адбываць пакаранне ў калоніі ўзмоцненага рэжыму, а Таццяна - у калоніі агульнага рэжыму.

Такі прысуд вынес сужэнцам суддзя Віцебскага абласнога суда Яўген Буруноў, судовы працэс праходзіў у закрытым фармаце.

Нагадаем, відэааператар-фрылансер Вячаслаў Лазараў быў затрыманы 9 лютага 2023 года ў Віцебску, супраць яго завялі крымінальную справу паводле часткі 2 артыкула 361-4 («Спрыянне экстрэмісцкай дзейнасці»). А 6 чэрвеня затрымалі жонку Вячаслава - Таццяну Пыцько. Ёй інкрымінавалі той жа артыкул або «стварэнне экстрэмісцкага фармавання або ўдзел у ім» (арт. 361-1 КК).

Непаўналетнюю дачку Таццяны і Вячаслава сацыяльныя службы змясцілі ў абласную лякарню, што робіцца ў тых выпадках, калі ў дзіцяці няма побач блізкіх і сваякоў ці апекуноў. Але прыкладна праз месяц дзяўчынку забралі да сябе сваякі Таццяны. Двое дзяцей Таццяны ад першага шлюбу зараз жывуць са сваім родным бацькам.