Украінскія зенітчыкі паказалі, як збівалі ракеты расейцаў з амерыканскага ЗРК Avenger
1- 25.09.2023, 12:30
- 6,284
![Украінскія зенітчыкі паказалі, як збівалі ракеты расейцаў з амерыканскага ЗРК Avenger](https://i.c97.org/ai/543001/aux-head-1680708913-20230403_avenger_120.jpg)
Відэа.
Байцы 1129 зенітнага ракетнага палка УСУ паказалі кадры адпрацоўкі па расейскіх крылатых ракетах з дапамогай ЗРК AN/TWQ-1 Avenger. Відэа было апублікаванае ў сацсетках, піша liga.net.
На роліку вайскоўцы паказваюць экран супрацьпаветранага зенітна-ракетнага комплексу: на ім у рэжыме начнога бачання паказваецца варожая крылатая ракета, на якую зенітчыкі наводзяць прыцэл.
Ваенны з пазыўным «Кіроўца», адказваючы на пытанне, як адчуванне пасля збітай паветранай цэлі расейцаў, кажа: «Хочацца яшчэ».
Яшчэ ў чэрвені ўкраінскія вайскоўцы тлумачылі, як працуюць на ЗРК Avenger: пасля атрымання загада мабільны комплекс выязджае, раскладваецца і ў баявой гатоўнасці чакае варожыя цэлі.
На ўзбраенні комплексу знаходзіцца рухомая вежа, на якой замацаваны ўстаноўкі з ракетамі Stinger. Імі і збіваюцца крылатыя ракеты акупантаў.