Беларуска загінула ў Турцыі падчас палёту на параплане

Яна выконвала скачок з інструктарам.

Беларуска разбілася падчас няўдалага палёту на параплане ля турэцкага горада Аланьі. Як піша «Зеркала», пра інцыдэнт 25 верасня паведаміла мясцовае выданне Cumhuriyet.

Паведамляецца, што беларуска з ініцыяламі Д.С. (поўнае імя ў публікацыі не паведамляецца) выконвала супольны скачок з інструктарам на ўзгорку Ясы-Тэпе. Падчас палёту параплан некаторы час лунаў у паветры, а затым страціў кіраванне і ўпаў у лесе.

На месца прыбылі ратавальнікі і медыкі. Лекары канстатавалі смерць беларускі. Пацярпелага інструктара павезлі ў шпіталь.

Паліцыя пачала расследаванне інцыдэнту.

Раней паведамлялася пра яшчэ адну трагедыю ў Турцыі з удзелам беларусаў. Легкавы аўтамабіль збіў двух нашых суайчыннікаў, якія ехалі на ровары з боку горада Каша, правінцыі Анталля. Пацярпелых даставілі ў лякарню, дзе беларуска Вікторыя Калаусава памерла.