Аўстралія на два гады працягнула забаронныя падаткі на тавары з Беларусі
- 25.09.2023, 16:37
- 1,576
![Аўстралія на два гады працягнула забаронныя падаткі на тавары з Беларусі](https://i.c97.org/p/articles/2015/ai-160566-aux-head-20150720_Australia_360.jpg)
Дадатковы падатак у суме 35% быў уведзены ў красавіку 2022-га года.
Аўстралія працягнула забаронныя падаткі на імпарт беларускіх і расейскіх тавараў да кастрычніка 2025 года. Аб гэтым заявіла МЗС краіны.
Дадатковы падатак ў суме 35% быў уведзены на расейскі імпарт у красавіку 2022 года. Цяпер гэты захад дзейнічацьме яшчэ два гады. Як зазначаецца ў прэс-рэлізе аўстралійскага ведамства, у выніку імпарт з РФ упаў на 95%.
«Аўстралія зноў заклікае Расею неадкладна вывесці свае войскі з тэрыторыі Украіны, а Беларусь спыніць падтрымліваць бессэнсоўную вайну Расеі», - адзначылі ў МЗС.
З 2022 года Белстат не публікуе звесткі аб замежным гандлі з асобнымі краінамі. Аднак у папярэднія гады найбольшы аб'ём беларускага экспарту тавараў у Аўстралію адзначаўся ў 2021 годзе. Ён складаў 39,5 млн даляраў. Таксама тавараў больш як на 30 млн даляраў Беларусь пастаўляла ў Аўстралію ў 2011, 2012 і 2018 гадах.