Лукашэнка баіцца атакі беспілотнікаў

Дыктатар падпісаў указ аб забароне ўвозу, захоўвання, абароту, эксплуатацыі і вырабу беспілотнікаў для фізічных асоб.

Аляксандр Лукашэнка падпісаў указ "Аб дзяржаўным уліку і эксплуатацыі грамадзянскіх беспілотных лятальных апаратаў". Дакументам уводзіцца забарона ўвозу, захоўвання, абароту, эксплуатацыі і вырабу беспілотнікаў для фізічных асоб.

"Дакумент накіраваны на забеспячэнне грамадскай бяспекі і рэгламентаванне парадку дзяржаўнага ўліку грамадзянскіх беспілотных лятальных апаратаў і авіямадэлей, а таксама іх выкарыстання", — гаворыцца ў паведамленні яго прэс-службы.

Цяпер увоз, захоўванне, абарот, эксплуатацыя і выраб БЛА дазволены толькі юрыдычным асобам і ІП для іх "прадпрымальніцкай і прафесійнай дзейнасці з захаваннем патрабаванняў ва ўказе".

Для ўвозу БЛА ў краіну трэба будзе атрымліваць дазвол у Дэпартаменце авіяцыі Мінтранса. Таксама ў Беларусі з'явіцца аўтаматызаваная сістэма дзяржуліку грамадзянскіх БЛА, якія належаць юрыдычным асобам і (або) ІП.

На працягу паўгода з моманту афіцыйнага апублікавання ўказа фізічныя асобы, у якіх ёсць дроны і беспілотнікі, могуць прадаць іх арганізацыям або індывідуальным прадпрымальнікам або перадаць іх на захоўванне ва ўпаўнаважаную арганізацыю, вызначаную ўрадам.

Для ўвозу, эксплуатацыі і вырабу БЛА фізічнымі асобамі ўказ уступае ў сілу пасля афіцыйнага апублікавання, а ў пытанні захоўвання і абароту - праз шэсць месяцаў.