У Менску прадаюць «адзінку» амаль за 720 тысяч рублёў

Што за кватэру прапануюць за такія грошы.

На ўскраіне Менска, у мікрараёне Лебядзіным, прадаюць аднапакаёўку з вялікай тэрасай. Цана кватэры — больш за 700 000 рублёў. Zerkalo.io паглядзела, што ёсць усярэдзіне аб'екта.

У мікрараёне Лебядзіны, на праспекце Машэрава прадаюць вялізную аднапакаёвую кватэру агульнай плошчай амаль 112 «квадратаў». Аднак прадавец звяртае ўвагу, што плошча кватэры большая за кошт тэрасы і ў рэальнасці складае больш за 215 м2.

Аб'ект знаходзіцца на першым паверсе 11-павярховага дома, пабудаваным у 2015 годзе. Жылы пакой тут сумешчаны з кухняй, санвузел сумешчаны, ёсць асобны гаспадарчы пакой і прасторны тамбур. Бонусам ідзе парковачнае месца ў падземным паркінгу.

Кватэра добра адрамантаваная і цалкам гукаізаляваная. Стаіць вентыляцыйная ўстаноўка, рэкуператар цяпла, паветра ў памяшканні можна ўвільгатняць, ахалоджваць або падаграваць. Ёсць бойлер, станцыя змякчэння вады і сістэма фільтраў.

Падлога з падагрэвам, пакрыццё — масіў арэха, сцены з натуральнага шпону дуба. Ёсць бытавая тэхніка: пральная і сушыльная машыны, лядоўня, мікрахвалёвая печка, мыйня посуду, пліта.

Жыллё прадаюць за 716 694 рублёў або 220 000 даляраў, «квадрат» каштуе 6427 рублёў або 1973 даляраў.