Мытня Грэцыі пачала разварочваць машыны з расейскімі нумарамі
2- 25.09.2023, 21:36
- 11,316
![Мытня Грэцыі пачала разварочваць машыны з расейскімі нумарамі](https://i.c97.org/ai/563917/aux-head-1694782684-20230914_auto_numar_360.gif)
Якія яшчэ краіны абмежавалі ўезд на аўтамабілях з расейскімі нумарамі.
Грэцкая мытня пачала спыняць аўтамабілі з расейскімі рэгістрацыйнымі нумарамі на мяжы краіны. Пра гэта «Фантанцы» расказала расейская падарожніца, якая ехала з Турцыі ў Вугоршчыну праз тэрыторыю Грэцыі.
Першапачаткова на пункце пропуску Іпсала – Кіпі на турэцка-грэцкай мяжы ў расейцаў не ўзнікала ніякіх праблемаў. Турэцкія памежнікі прапусцілі расейскіх грамадзянаў, а грэцкія – паставілі ў пашпартах расейцаў штампы пра ўезд у краіну. Аднак пасля грэцкія памежнікі запыталі страхоўку на аўтамабіль.
У падарожнікаў не было неабходнай дакументацыі, і яны пастанавілі набыць страхоўку на месцы. Страхоўнікі звязаліся з прадстаўнікамі мытні, а тыя прапанавалі расейцам вярнуцца назад у Турцыю, спасылаючыся на санкцыйную дырэктыву Еўракамісіі. Падарожнікам растлумачылі, што можна заехаць у краіну, але не на аўтамабілі з расейскімі нумарамі, і настойліва папрасілі пакінуць Грэцыю. Пры гэтым не ўсе аўтамабілі з расейскімі нумарамі маюць цяжкасці пры ўездзе, адзначыла суразмоўца «Фантанкі».
Пасля тлумачэнняў Еўракамісіі, апублікаваных у пачатку верасня, уезд на аўтамабілях з расейскімі нумарамі афіцыйна абмежавалі ўлады Нямеччыны, Літвы, Латвіі, Эстоніі, Польшчы і Фінляндыі. Аднак Грэцыя стала першай краінай, якая пачала выкарыстоўваць гэтае абмежаванне без афіцыйных аб'яваў. Нарвегія таксама заявіла пра планы ўвесці абмежаванні на ўвоз і выкарыстанне расейскіх аўтамабіляў, хоць канкрэтныя захады пакуль не былі вызначаныя.