Мянчук паспрабаваў купіць красоўкі ў Instagram за «выгадную цану»

У выніку застаўся без 4 тысяч рублёў.

Жыхар Менска хацеў купіць праз сацыяльныя сеткі пару красовак, але стаў ахвярай махляроў. Драбніцы расказалі ў МУС.

Мужчына зайшоў на старонку інтэрнэт-крамы, дзе прадаваўся абутак за "выгадную цану". Старонка «выклікала давер, і мянчук наважыўся на куплю».

Ён пералічыў прадаўцу 230 рублёў, але неўзабаве яму паведамілі, што тавару на складзе няма, і пакупнік мусіць зарэгістраваць вяртанне грошай. У працэсе гутаркі пацярпеламу перасылалі фішынгавыя спасылкі, праз якія ён пераходзіў і ўводзіў рэквізіты сваіх банкавых картак.

Праз пэўны час пакупец атрымаў паведамленне аб тым, што з ягоных рахункаў былі спісаныя блізу 4 тысячы рублёў.

Распачатая крымінальная справа за махлярства.