Чаму Нямеччына адкладае перадачу Украіне ракет Taurus

WSJ высветліла прычыну.

Нямеччына адкладае адпраўку Украіне ракет вялікай далёкасці Taurus праз боязь у нібыта наўпроставай канфрантацыі з Расеяй.

Пра гэта паведамляе The Wall Street Journal.

Прычынай асцярог з'яўляецца здагадка, што для перадачы такіх ракет Нямеччыне спатрэбіцца адправіць ва Украіну спецыялістаў для працы «на зямлі». Менавіта гэта, на думку Берліна, нібыта з'яўляецца наўпроставай канфрантацыяй з Расеяй.

Нямецкія афіцыйныя асобы заявілі, што трохпартыйны кааліцыйны ўрад Нямеччыны ў прынцыпе ўхваліў пастаўку Taurus, але канцлер Олаф Шольц прыпыніў гэты крок.

Лідар Нямеччыны баіцца, што нямецкаму персаналу давядзецца паехаць ва Украіну, каб дапамагчы ў абслугоўванні і эксплуатацыі складанай зброі.

Са слоў чыноўнікаў, Шольц мяркуе, што для перамяшчэння вайскоўцаў у зону баявых дзеянняў патрабуецца галасаванне парламента.

Ён таксама занепакоены тым, што такі крок можа ўцягнуць Нямеччыну яшчэ глыбей у канфлікт, што можа прывесці да наўпроставай канфрантацыі з Расеяй.

Канцлер павінен спыніць блакаду паставак Taurus. Нерашучасць і тэхнічныя апраўданні толькі спрыяюць умацаванню веры расейскага дыктатара Уладзіміра Пуціна ў тое, што ён усё яшчэ можа перамагчы, і гэта толькі падаўжае вайну», - сказаў дэпутат Антон Хофрэйтэр.

Прадстаўнік Шольца заявіў, што плана хуткай пастаўкі ракет Taurus не існуе. Сумневы канцылярыі з нагоды адпраўкі тэхнічных адмыслоўцаў для дапамогі ў эксплуатацыі ракеты з'яўляюцца толькі апошнімі ў доўгім спісе праблем, злучаных з патэнцыйнай пастаўкай Taurus.

Апошнія некалькі месяцаў у Нямеччыне абмяркоўваюць пастаўкі ва Украіну ракет Taurus. Кіеву неабходнае такое ўзбраенне для таго, каб наносіць удары па тылавых пазіцыях расейскіх акупантаў.

Яшчэ 15 верасня кіраўнік Мінабароны Нямеччыны Борыс Пісторыус расказваў, што пастановы аб перадачы могуць быць прынятыя цягам аднаго-двух тыдняў.

Пры гэтым у Бундэстагу заяўлялі, што пастаўкі блакуе толькі канцлер Олаф Шольц.