Падчас раскопак на месцы старога Менска знайшлі манету, якой 1250 год

Археолагі назвалі знаходку сэнсацыйнай.

Падчас раскопак на месцы старога Менска знайшлі манету, якой 1250 год.

Аб сенсацыйнай знаходцы падчас раскопак на менскім гарадзішчы паведамілі на інстаграм-старонцы "Стары Менск".

Знойдзеная манета — арабскі срэбны дырхем, які выбіваўся ў VIII стагоддзі, у 770-я гады.

Тое, што такая манета патрапіла сюды больш за 1200 гадоў таму — «сэнсацыя нават для Менкі», сцвярджаюць аўтары роліка. Хаця сцвярджаць, што Менску таксама столькі гадоў, такая знаходка сама сабой, вядома, падстаў не дае.

Археолагі цяпер далей робяць прарэзванне вала і ўжо зайшлі ніжэй за ўзровень пляцоўкі самога гарадзішча. Манету знайшлі ў самым сэрцы вала, там, дзе ёсць рэшткі драўляных канструкцый.