Хунвейбін Лукашэнка

Як міністр адукацыі робіць брудную працу за гаспадара.

За крыху больш як паўтара года на пасадзе міністра адукацыі Андрэй Іванец ужо «пераплюнуў» Ігара Карпенку, які кіраваў ведамствам пяць гадоў. Сістэма адукацыі ў Беларусі пад кіраўніцтвам Іванца імкліва дэградуе.

UDF расказвае, чым паспеў адзначыцца малады міністр пасля прызначэння на высокую пасаду. Чаму Аляксандр Лукашэнка зрабіў стаўку на Іванца?

Андрэя Іванца прызначылі міністрам адукацыі ў лютым 2022 года. Кандыдатура шмат каго здзівіла: Іванцу на той момант было ўсяго 37 гадоў.

Чаму ж выбар Лукашэнкі ўпаў на яго?

Рэч у тым, што Іванец зарэкамендаваў сябе суперлаяльным уладзе функцыянерам, да таго ж выканаўчым. На момант прызначэння міністрам ён ужо ўваходзіў у склад Савета Рэспублікі, а ў 2020-м зрабіў наступную заяву:

«Настаўнік не павінен звяртаць увагі на свой заробак, паколькі прафесія настаўніка з'яўляецца прызваннем».

У Іванца не было ніякіх думак наконт таго, як рэальна палепшыць справы ў сферы адукацыі, затое ён быў ідэалагічна вывераным кіраўніком.

Закрыццё прыватных школ

У 2021 годзе ў Беларусі адбыўся пагром структур грамадзянскай супольнасці: недзяржаўных арганізацый. Праз год Іванец, можна сказаць, працягнуў гэтую лінію.

У верасні мінулага года ён даў справаздачу аб закрыцці прыватных школ: з некалькіх соцень недзяржаўных устаноў адукацыі толькі 13 атрымалі акрэдытацыю ад Мінадукацыі.

Скандал з ЦЭ і пагрозы з боку Іванца

Калі ў канцы траўня бягучага года адзінаццацікласнікам прыйшлі вынікі цэнтралізаванага іспыту па беларускай і рускай мовах, і яны, іх бацькі былі мякка кажучы здзіўлены: вынікі палічылі няправільна.

Андрэй Іванец назваў гэтыя сцвярджэнні «фейкам», а калі скандал стаў разрастацца, нават пайшоў на пагрозы.

«Міністэрствам адукацыі будзе адсочвацца кожны выпадак распаўсюджвання недакладнай інфармацыі, матэрыялы будуць накіраваны для дачы ацэнкі дзеянням распаўсюджвальнікаў фейкаў», – прыгразіў Іванец.

Аднак міністру прыйшлося вельмі хутка «даць заднюю»: на скандале надумаў папіярыцца Лукашэнка і вынікі ЦЭ былі пералічаныя.

Атака на Іванца з боку Бондаравай

Пасля ліквідацыі апанентаў улады з грамадскага жыцця ўнутры Беларусі прыхільнікі рэжыму сталі паводзіць сябе як павукі ў слоіку. Каля месяца таму інфаказачка Вольга Бондарава абвінаваціла Іванца ў распаўсюджванні… нацызму.

На ейную думку, расказваючы пра беларускамоўныя школы, міністр нібыта наўмысна прынізіў значэнне другой дзяржаўнай мовы — расейскай.

«Падобныя дзеянні дзяржчыноўнікаў назіралі і ў перадмайданнай пранацысцкай Украіне: там таксама спачатку пазітыўна дыскрымінавалі рускую мову, а зараз гатуюць стравы «з расейскіх немаўлят». Смярдзіць і ў Беларусі нацызмам. Моцна. Я б не здзівілася і не здзіўляюся, сустракаючы такую пранацысцкую рыторыку ад сістэмных нацыстаў. Але ад міністра адукацыі?» - напісала Бондарава.

Іванец гэты наезд «праглынуў».

Радыкальныя ініцыятывы Іванца аб размеркаванні

На нядаўняй нарадзе аб адукацыі малады міністр выступіў за павелічэнне тэрміну размеркавання для выпускнікоў ВНУ і за размеркаванне «платнікаў» - нароўні з «бюджэтнікамі».

«Сёння і бюджэтнік, і платнік, на нашу думку, мусяць адпрацоўваць. Адпаведныя змены мы гатовыя ўнесці ў Кодэкс аб адукацыі», - заявіў Іванец.

Імкненне міністра ацаніў і Лукашэнка, і прапагандысты. Ігар Тур патлумачыў: звычайна чыноўнікі спіхваюць адказнасць за непапулярныя пастановы на Лукашэнку, а міністр адукацыі «сам прапанаваў і сам абазначыў, што пачаў разглядаць пытанне і ўзяў рызыкі на сябе».

Тое, што ад яго дзеянняў беларуская сістэма адукацыі працягне дэградаваць, Іванца відавочна не хвалюе - у адрозненне ад таго, што пра яго падумае Лукашэнка.

Прысуд за абразу міністра

17 жніўня ў Берасці суд разгледзеў крымінальную справу супраць Дзмітрыя Семака. Яго абвінавацілі паводле арт. 369 КК (абраза прадстаўніка ўлады).

Паводле матэрыялаў абвінавачання, 23 чэрвеня 2022 года ён напісаў тэлеграм-каментар пра міністра па прозвішчы І. У гэтым каментары экспертыза знайшла «негатыўную адзнаку» міністра, выяўленую «ў ненарматыўнай форме маўлення».

«Берасцейская вясна» праверыла спіс дзейных міністраў у Беларусі. З прозвішчам, якое пачыналася б з літары І, ёсць толькі міністр адукацыі Андрэй Іванец.

Берасцейца прысудзілі да трох месяцаў арышту і канфіскацыі тэлефона «як сродка ўчынення злачынства».