Гарадзенскі Плюшкін давёў сваё жыллё да шакавальнага стану

Слабанервным лепш не глядзець.

Калі вы толькі паелі ці збіраецеся, калі вы моцна ўражлівы, то лепш не ўключайце гэта відэа. Проста пачытайце матэрыял, і ўсё зразумееце.

У адным са шматпавярховікаў на вуліцы Дзяржынскага жыхары пакутуюць праз нядбайнага суседа. Мужчына зладзіў з кватэры гэтакую сумесь сметнішча, памыйніцы і нават свінарніка. Глядзіце, шпалер на сценах няма, мэбля ў жудасным стане. Усюды бруд і з'едкі, якія валяюцца ў самых нечаканых месцах.

Відэа зняў адзін з суседзяў, які зайшоў заклікаць мужчыну да парадку. Гук у відэа давядзецца прыбраць, бо візіцёр не скупіцца на эпітэты. «Смурод такі, што дыхаць немагчыма. Прычым, пранікае гэты пах да ўсіх суседзяў. Ідзе праз стаякі і вентыляцыю. Прусакі таксама паўзуць у суседнія кватэры. Што з ім рабіць, мы не ведаем?», - кажа чытач Newgrodno.by, які даслаў гэта відэа.

Усім гэтым актыўна карыстаюцца прусакі. Гэтыя кузуркі даслоўна паўсюль. Вось яны пазапаўнялі талерку з недаедзеным абедам…

Кажуць, што гаспадар «забівае» не толькі на санітарны стан. 1,5 гады таму ў кватэры здарыўся пажар. Тады цудам ніхто не пацярпеў, але цяпер суседзі жывуць, як на парахавой бочцы.

З падобнай праблемай сутыкнуліся і жыхары дома на вуліцы Касцюшкі (гэта адносна новая забудова ў раёне Шчорса і Пралетарскай). У гэтым шматпавярховіку таксама адзначаецца нашэсце прусакоў і блашчыц, зладзіцца з якім сваімі сіламі немагчыма.

Што рабіць жыхарам? Адзначым, што на відэа бачнае парушэнне правілаў карыстання жылымі памяшканням. Праўда, гэты факт мусяць зафіксаваць камунальныя службы. Таму трэба пісаць і звяртацца ў ЖЭС, а калі гэта не працуе, то ў вышэйшыя інстанцыі. Варта расказаць аб праблемным суседзе і міліцыі, і санітарнай службе, і нават адміністрацыі раёна. Калі на папярэджанне ад службаў мужчына не адрэагуе, то яго на пастанову суда могуць і зусім выселіць з кватэры.