У Кангрэсе ЗША адбылося першае слуханне пра імпічмент Байдэна

Большасць у Кангрэсе мае Рэспубліканская партыя

Палата прадстаўнікоў Кангрэса ЗША, дзе большасць мае Рэспубліканская партыя, у чацвер правяла першыя слуханні ў рамках расследавання справы пра імпічмент прэзідэнта Джо Байдэна.

Пра гэта гаворыцца ў публікацыі Reuters.

Рэспубліканцы, якія ўзначальваюць расследаванне, падчас слуханняў заявілі, што Джо Байдэн зманіў пра замежныя бізнэсовыя сувязі чальцоў сям'і – перш за ўсё сына Хантэра – і не ўжыў захады, каб размежаваць іх са сваімі афіцыйнымі абавязкамі на пасадзе віцэ-прэзідэнта ЗША з 2009 да 2010 года.

На слуханні для давання паказанняў выклікалі эксперта ў пытаннях судовай бухгалтэрыі, былога чыноўніка Міністэрства юстыцыі ЗША і двух прафесараў права.

Рэспубліканцы сцвярджаюць, што атрымалі банкаўскія пераводы ад грамадзянаў Кітая, дасланыя Хантэру, якія нібыта былі ажыццёўленыя на хатні адрас Джо Байдэна ў штаце Дэлавэр – і незразумела, ці атрымліваў ён асабіста гэтыя грошы.

У цэлым за папярэднія месяцы расследавання ў Палаце прадстаўнікоў ЗША так і не знайшлі доказаў неправамоцных дзеянняў Байдэна. Зрэшты, у будучыні рэспубліканцы хочуць атрымаць доступ да асабістых і банкаўскіх звестак Хантэра Байдэна і брата прэзідэнта Джэймса.