Страх даціснуў Лукашэнку

Што азначае ўказ аб забароне беларусам выкарыстоўваць дроны.

25 верасня Аляксандр Лукашэнка падпісаў указ, які забараняе беларусам выкарыстоўваць беспілотнікі.

Выключэннем стануць толькі арганізацыі і ІП, якія выкарыстоўваюць дроны ў мэтах сваёй прадпрымальніцкай і прафесійнай дзейнасці, але з захаваннем патрабаванняў, устаноўленых указам.

Цяпер для ўвозу дрона ў Беларусь арганізацыям і ІП неабходна будзе атрымаць адпаведны дазвол у Дэпартамента авіяцыі міністэрства транспарту і камунікацый.

Беларусы ўжо спяшаюцца пазбавіцца ад беспілотнікаў: некаторыя прадаюць іх за бесцань.

Сайт UDF прааналізаваў пра што можа сведчыць указ Аляксандра Лукашэнкі.

Правілы ўзмацнілі жорсткасць усяго 4 месяцы таму. Страх прымусіў Лукашэнку перагледзець іх

З 4 чэрвеня 2023 года кожны ўладальнік дрона павінен быў пацвердзіць законнасць набыцця апарата і атрымаць на яго рэгістрацыйны нумар – для чаго трэба было прайсці навучанне. Акрамя таго, кожны ўладальнік зарэгістраванага беспілотніка павінен быў атрымаць дазвол на ўзлёт і аэрафотаздымку.

Гэтыя ўзмацненні жорсткасці Дэпартамент цывільнай авіяцыі анансаваў яшчэ ў канцы 2022-га. За парушэнне закону ўвялі штраф да 20 базавых адзінак.

Але, як бачым, новыя драконаўскія меры прадзейнічалі ўсяго некалькі месяцаў. Што ж прымусіла Лукашэнку падпісаць новы ўказ?

Афіцыйна заяўляецца, што мэта ўказа - "забяспечыць грамадскую бяспеку і рэгламентаваць парадак дзяржаўнага ўліку цывільных БПЛА". Але магчыма сапраўдная прычына - у страху Лукашэнкі перад дыверсіямі.

Нагадаем, што ў лютым бягучага года на аэрадроме Мачулішчы ў выніку выбухаў быў пашкоджаны расейскі ваенны самалёт далёкага радыёлакацыйнага выяўлення А-50. Дыверсію арганізавалі з дапамогай дронаў.

Пасля доўгіх разважанняў і шматлікіх інцыдэнтаў з дронамі ў Расеі Лукашэнка надумаў усё ж забараніць беларусам выкарыстоўваць беспілотнікі. Хаця відавочна, што гэтая мера не можа гарантаваць, што дыверсіі з выкарыстаннем беспілотнікаў у Беларусі не паўторацца.

Лукашэнка чарговым разам напляваў на правы і патрэбы беларусаў: сваім указам ён ізноў залічыў Беларусь да самых аўтарытарных краін

Дроны масава выкарыстоўваюцца шараговымі грамадзянамі для аматарскіх здымкаў прыроды і мясцовасці, сямейных і грамадскіх мерапрыемстваў. Падпісаўшы свой указ, Лукашэнка чарговым разам пазбавіў беларусаў часткі магчымасцяў.

На такія захады не пайшлі нават у такіх аўтарытарных краінах, як Расея і Іран. У РФ уведзеная толькі часовая забарону на карыстанне дронаў - у 65 рэгіёнах. У некаторых абласцях палёты дазволеныя пры наяўнасці спецыяльнага дазволу адміністрацыі. За парушэнне забароны расейцам пагражае штраф.

Пры гэтым парушальнікаў спецыяльна, здаецца, не шукаюць. Так у Бранскай вобласці, якая мяжуе з Украінай, за мінулы год выявілі ўсяго пяць выпадкаў парушэння, былі прызначаныя штрафы.

Інфармацыя аб выкарыстанні цывільных дронаў у аўтарытарным Іране ў адкрытых крыніцах дастаткова супярэчлівая. Мяркуючы з усяго, для гэтага трэба атрымаць спецыяльны дазвол.

Некалькі гадоў таму ў Іране затрымалі ўкраінскага падарожніка і блогера Арцемія Сурына, якога за выкарыстанне дрона абвінавацілі ў шпіянажы. Пасля ўмяшання пасольства Украіны ён быў вызвалены. Падарожнік падкрэсліў, што мясцовыя законы не парушаў: ён меў дазвол на здымку, яго дрон быў зарэгістраваны і правераны на мяжы пры ўездзе з Пакістана.

Да якіх краін далучылася Беларусь пасля ўказу Лукашэнкі?

Вядома, у спісе знаходзіцца Паўночная Карэя: турыстаў у краіну пускаюць за вялікія грошы, а вось дроны не дапускаюць: баяцца, як бы тыя не знялі іх вайсковыя або стратэгічныя аб'екты. Самі жабракі паўночнакарэйцы абзавесціся беспілотнікам не могуць.

Таксама ў спісе такія дзяржавы як Куба, Ірак (нагадаем, там нядаўна скончылася вайна) і Узбекістан.