Грозны абвешчаны сталіцай РФ

Пакуль толькі «культурнай».

Прыезд кіраўніка Чачэніі Рамзана Кадырава ў Маскву, нягледзячы на публікацыю відэа са збіццём жыхара Валгаграда Мікіты Журавеля, скончыўся для кіраўніка Чачэніі не допытамі следчых, а прыемнымі падарункамі ад прэзідэнта Пуціна, паведамляе The Moscow Times.

На конкурсе «Культурная сталіца года», які праводзіцца прэзідэнцкім Фондам культурных ініцыятыў, перамогу прысудзілі Ніжняму Ноўгараду і Грознаму. Хаця пераможца павінен быў быць адзін, арганізатары конкурсу не змаглі адмовіць Грознаму, які атрымаў гэты статус за зладжаныя для журы танцы. Старшыня аргкамітэта Мікалай Навічкоў сказаў, што падчас абмеркаванняў не змаглі абраць толькі адзін горад.

У выніку на цырымоніі ўзнагароджання назвалі двух пераможцаў. Ніжні Ноўгарад стаў «Культурнай сталіцай 2024 года», а аналагічны ранг 2025 года атрымаў Грозны.

На сайце праекта таксама пазначана, што фіналістамі конкурсу на званне культурнай сталіцы ў 2024 годзе сталі гарады Калінінград, Новасібірск, Самара, Томск, Чэбаксары і Чыта. Пераможца конкурсу атрымае сродкі з бюджэту на рэалізацыю ініцыятыў.

Гэта не адзінае заахвочванне Кадырава. Пуцін падтрымаў ідэю будаўніцтва новай мячэці ў Паўднёвым Бутаве. «Кіраўнік дзяржавы падкрэсліў вялікую значнасць гэтага праекта», — сказаў Кадыраў. Мячэць будзе пабудаваная на вуліцы імя Ахмата-Хаджы Кадырава, бацькі Рамзана Кадырава і яго папярэдніка на пасадзе кіраўніка Чачэніі.

Кадыраў некалькі дзён таму апублікаваў відэа, на якім ягоны 15-гадовы сын збівае Журавеля. Ніякай рэакцыі ад праваахоўных органаў на гэты ролік не было. Прэс-сакратар Крамля Дзмітрый Пяскоў адмовіўся каментаваць збіццё сынам Кадырава арыштаванага за спаленне Карана.