Кіраўнік Мінбуда РФ заявіў пра немагчымасць аднавіць гарады на анэксаваных тэрыторыях Украіны

Расейцы іх разбурылі дашчэнту.

Расея не будзе аднаўляць некаторыя гарады на акупаванай тэрыторыі Украіны, разбураныя падчас вайны, заявіў міністр будаўніцтва і ЖКГ РФ Ірэк Файзулін.

Ён растлумачыў, што ў шэрагу выпадкаў маштаб разбурэнняў такі, што гэта ўжо не мае сэнсу. У якасці прыкладу Файзулін прывёў Папасную, размешчаную ў Севераданецкім раёне Луганскай вобласці. «Там статысячны горад, нічога там не засталося: жывуць сем чалавек, не хочуць сыходзіць з індывідуальнага жылля. Мы пакуль там нічога не робім», – сказаў ён (цытата паводле ТАСС).

У сувязі з гэтым міністр заклікаў не даваць «ілжывых абяцанняў» жыхарам анэксаваных тэрыторый Украіны, якія спадзяюцца на аднаўленне сваіх гарадоў. «Бярыце да ўвагі, што жыллёва-камунальная гаспадарка, праца з людзьмі былі там зусім на іншым узроўні пабудаваныя. Нават нормы будаўнічыя, так званыя дзяржаўныя нормы, былі зусім іншыя», – адзначыў ён.

Файзулін таксама звярнуў увагу на дэфіцыт фінансавання аднаўленчых працаў у акупаваных рэгіёнах. «У нас трохгодкі на ўсіх кірунках. Велізарныя, быццам бы, грошы – 4,7 трлн рублёў на тэрыторыю, але на капіталку – гэта 300 млрд рублёў на год, што няшмат. У нас сёлета і летась 115,6 млрд рублёў уклалі рэгіёны-шэфы. Прычым такія нават, як Тува, у якой на свае праграмы грошай няма», – удакладніў ён.

На думку міністра, аднаўленчыя працы не скончацца і да 2030 года, бо на частцы тэрыторый яны пакуль нават не пачаліся. «Мы яшчэ толкам не працуем у Севераданецкай агламерацыі, на Арцёмаўск (так у РФ называюць Бахмут – TMT) не прыйшлі, у нас 33 населеныя пункты ў Харкаўскай вобласці знаходзяцца, мы там першаснае абследаванне толькі пачынаем», – прызнаў ён.

Паводле звестак Дзяржаўнай службы статыстыкі Украіны, на 1 студзеня 2021 года ў Папаснай жылі 19672 чалавекі. У Папаснянскай гарадской ваеннай адміністрацыі сцвярджалі, што на стан красавіка 2023 г. там заставаліся блізу 200 чалавек.

У выніку вайны горад, пра захоп якога Расея абвесціла 9 траўня летась, практычна зраўнялі з зямлёй, цяпер у ім няма вады, святла і газу. Прызначаны Расеяй кіраўнік «ЛНР» Леанід Пасечнік заяўляў, што Папасная разбураная на 96% і, верагодна, аднаўленню не падпадае.

Кіраўнік Луганскай абласной адміністрацыі Сяргей Гайдай у студзені 2023 года расказаў, што за месяцы цяжкіх баёў таксама былі знішчаныя Белагораўка, Крамянная, Рубежнае, Залатое, Горнае і Лісічанск. Ён паабяцаў, што Украіна верне і адновіць Папасную. «Папялішча стане зноў садам, Папасная зноў будзе шчаслівая са сваімі жыхарамі», – падкрэсліў ён.