«Дзіркі прабіла наскрозь»: у РФ паказалі наступствы дыверсіі на чыгунцы ў Ніжнім Тагіле

Відэафакт.

Выбухныя прыстасаванні, закладзеныя пад чыгуначныя платформы ў Свярдлоўскай вобласці, прабілі скразныя адтуліны ў цыстэрнах для перавозкі паліва. Каля часткі вагонаў пагнуліся канструкцыі. Грузавы цягнік з некалькімі дзясяткамі цыстэрнаў адагналі на запасныя рэйкі - выкарыстоўваць яго паўторна пакуль не плануюць. Аб дэталях дыверсіі ў глыбокім расейскім тыле гаворыцца на відэа, апублікаваным украінскім блогерам і валанцёрам Сяргеем Сцярненкам у Telegram-канале.

У нататцы Сцярненкі размешчанае відэа, знятае невядомым грамадзянінам, магчыма, у Расеі. У подпісе пазначана, што месца падзей – Свярдлоўская вобласць, дзе днямі адбылася дыверсія на чыгунцы. З якой крыніцы атрыманы запіс, не пазначана.

На двуххвілінным відэа расеец паказвае дзевяць цыстэрнаў для паліва, якія патрапілі пад удар “дыверсантаў”. Паказвае, што ў некаторых цыстэрнаў выбухная хваля ўвагнула ўнутр ці вонкі пласт металічнай абалонкі, ёсць пагнутыя часткі канструкцыі. Некаторым "пашанцавала" менш - яны атрымалі скразныя адтуліны: такіх цыстэрнаў аўтар запісу налічыў тры.

Прыкметна, што таўшчыня прабітага пласта металу - амаль 1 см. Аўтар запісу здзіўляецца сіле выбуху, які мог такое зрабіць. Таксама ўказвае на некаторыя асаблівасці дыверсіі: паводле ягоных слоў, зарад паклалі ў невялікае паглыбленне паміж цыстэрнамі і чыгуначнымі платформамі, на якіх іх перавозяць.

“Вось вагончыкі, якія ірванулі - дзевяць штук. Парабіла скразныя дзюры - гэта ж якой сілы выбух?! Гэта шэдэўральна [паказаў вывернутыя вонкі кавалкі металу - рэд.]. Будзьце пільныя!”, - апісаў свае ўражанні жыхар Свярдлоўскай вобласці.

Адзначым, аб дыверсіі ў Свярдлоўскай вобласці стала вядома 8 студзеня. Мясцовыя жыхары паведамілі, што адбыўся выбух у раёне станцыі Сан-Даната і нафтабазы "Газпрама", размешчанай непадалёк. Пазней з'явіліся відэа, на якіх расейскія праваахоўнікі правяраюць дакументы ў аўтамабілістаў, у той час як чыгуначныя шляхі перакрылі для руху цягнікоў. Пасля расейскія СМІ прызналі, што адбыўся "інцыдэнт на чыгуначных рэйках", але прыроду інцыдэнту не ўдакладнялі.