Індыя пастанавіла закупляць савудаўскую нафту замест расейскай

За расейскую складана плаціць.

Найбуйнейшыя індыйскія НПЗ пастанавілі закупіць дадатковыя партыі нафты ў Савудаўскай Арабіі пасля таго, як сутыкнуліся з праблемамі ў аплаце барэляў з Расеі.

Як паведамляе Reuters са спасылкай на крыніцы ў галіне, два найбуйнейшыя дзяржаўныя індыйскія НПЗ — Indian Oil Corp і Bharat Petroleum Corp — плануюць набыць 2 млн барэляў у савудаўскай дзяржкарпарацыі Saudi Aramco з пастаўкай у лютым. Indian Oil звярнулася да Эр-Рыяду, а таксама разлічвае на дадатковыя пастаўкі нафты з Заходняй Афрыкі замест расейскага гатунку Sokol, распавяла адна з крыніц Reuters.

Індыйскія НПЗ не змаглі атрымаць як мінімум 6 млн барэляў Sokol у лістападзе і снежні: танкеры з нафтай, якая здабываецца на Камчатцы, тыднямі стаялі на рэйдзе ля берагоў Паўднёвай Азіі, чакаючы разгрузкі, а затым паплылі да новых пакупнікоў.

Са слоў крыніцы Reuters, узніклі цяжкасці з аплатай нафты. Даччыная кампанія "Раснафты" не змагла адкрыць рахунак у Аб'яднаных Арабскіх Эміратах, каб індыйскія кліенты расплаціліся ў дырхамах. У выніку пастаўкі расейскіх барэляў у Індыю абрынуліся на траціну, да мінімуму за 11 месяцаў: у снежні яны склалі толькі 1,5 млн барэляў на дзень, хоць у траўні дасягалі 2,15 млн.

Міністр нафты Індыі Хардэп Сінгх заявіў, што праблема з расейскай нафтай не ў аплатах, а ў коштах: зніжкі на Sokol значна зменшыліся, і НПЗ аддаюць перавагу іншым пастаўшчыкам. Аб'ёмы закупаў у Расеі - гэта «проста функцыя ад цаны, якой гатовыя закупляць нашы заводы», казаў Сінгх у пачатку студзеня. Савудаўская нафта адказвае індыйскім запытам: у студзені каралеўства абвясціла аб зніжках для кліентаў ва ўсім свеце, а для краін Азіі паменшыла цану на $2 за барэль для свайго асноўнага гатунку Arab Light.

Крыніцы Reuters намагаюць, што аплата расейскай нафты застаецца перашкодай для індыйскіх НПЗ, насуперак заявам уладаў. Расейскія нафтавікі яшчэ летась прапаноўвалі перайсці на разлікі ў кітайскіх юанях, але гэта не задаволіла індыйскі бок. Аплата ў рупіях выявілася непрымальнай для Расеі: зваротнай плыні тавараў, на якія можна было выдаткаваць індыйскую валюту, Індыя ў РФ не пастаўляе, і ў выніку рупіі збіраюцца ў індыйскіх банках. Крыніцы Reuters ацэньвалі завіслую суму на $40 млрд, хоць улады і ЦБ РФ запэўнівалі, што аб'ём несупастаўна меншы.