«Ёсць знаёмыя, якія атрымліваюць у TikTok і 8 тысяч рублёў»

Як і колькі можна зарабляць беларусу ў TikTok?

Знайсці чалавека, які б пагадзіўся расказаць пра ўсе магчымасці гэтай сацыяльнай сеткі, выявілася не так проста, але CityDog.io гэта ўдалося.

Адкрыта спыталі ў TikTok-блогераў: «Колькі вы зарабляеце?»

Для гэтага напісалі дзяўчатам і хлопцам з рознай колькасцю падпісчыкаў у TikTok — ад 30 000 да больш за 2 мільёны. Большасць з іх на паведамленні не адказалі, але некаторыя ўсё ж далі зваротную сувязь: «Прывітанне, дзякуй, але не», «Вітаю, гэта прыватная тэма», «Дзякуй, але я адмоўлюся ад каментараў», «Дык я не TikTok токер, мой заробак з TikTok роўны нулю».

Але адзін адказ быў атрыманы станоўчы: «Прывітанне! Я і не TikTok токер зусім і не зарабляю тамака, калі сапраўды. Але на некаторыя вашыя пытанні адказаць змагу». З гэтым маладым менчуком, у якога ў TikTok 30-тысячная аўдыторыя, выданне і паразмаўляла. Але дамовіліся, што імя яго называць не будуць.

Гісторыя (не)поспеху: «Усё залежала ад таго, ці патрапіла відэа ў рэкамендацыі»

- У TikTok я даўно, яшчэ з таго моманту, калі гэта быў Musical.ly. У мяне заўсёды было жаданне мець аўдыторыю, нешта здымаць, быць у трэндзе, але не было нейкіх актыўных крокаў да гэтага, не было такога, што я рашуча браўся за раскрутку сваёй старонкі. Я проста глядзеў, што папулярнае ў TikTok, і стараўся рабіць нешта прыдатнае, каб гэта залятала ў рэкамендацыі.

Аб маім кантэнце складана нешта сказаць. Паколькі гэта ўласная старонка, у мяне ніколі не было ніякай экспертнасці, ніякай канкрэтнай тэматыкі. Я проста здымаў агулам усё: і мэмы, і відэа з жыцця - абсалютны live-кантэнт у перабіўку з нейкімі гумарыстычнымі відэа пад смешныя папулярныя гукі.

І я б не сказаў, што ў мяне ў адзін нейкі момант пачаўся актыўны рост аўдыторыі: усё залежала ад таго, ці патрапіла відэа ў рэкамендацыі. Калі яно добра пайшло, то і падпісчыкаў дадавалася дастаткова шмат. Але памятаю, што імкліва пачаў набіраць у 2021 годзе: перыядычна мае відэа заляталі, і тады я набраў 10000 падпісчыкаў. Для мяне гэта было сапраўднай падзеяй!

А ўлетку 2022-га ў мяне ўжо было блізу 30 000. І з таго моманту аўдыторыя не расце, бо я перастаў актыўна весці TikTok. Так, хацелася б здымаць часцей, але такога жадання, як раней, ужо няма.

Як і колькі можна зарабляць: «Ёсць знаёмыя, якія атрымліваюць і 8 тысяч рублёў, і больш»

- Мне TikTok даў вельмі добрую назіральнасць, разуменне алгарытмаў, што дазволіла нядрэнна зарабляць як эксперту. Я пачаў атрымліваць прыбытак з прасоўвання чужых старонак: у мяне ёсць некалькі розных бізнэс-акаўнтаў, якія я вяду.

Тут цэннік можа быць розны: усё залежыць ад таго, колькі праектаў было за месяц, якія абавязкі і гэтак далей. Але па мерках Менска выходзіць нядрэнна: часам атрымліваецца зарабіць 1000 даляраў за месяц, часам крыху менш. Канешне, калі параўноўваць, скажам, з праграмістамі, гэта не такія ўжо і вялікія грошы, але мне, 20-гадоваму хлопцу, дастаткова. І я адчуваю, што я малайчына.

Калі казаць пра заробкі ў самім акаўнце, то можна спрабаваць гэта рабіць з дапамогай жывых эфіраў. Але не вельмі зразумелая схема, як выводзіць адтуль грошы. Плюс вам давядзецца стрыміць гадзінамі, каб добра зарабіць.

Яшчэ можна зарабляць на рэкламе: у мяне ў самім TikTok рэклама была, напэўна, разы з два-тры — за відэа плацілі блізу 40-50 рублёў, недзе так. Але я б не сказаў, што кліенты часта бяруць рэкламу ў самім TikTok: многія блогеры проста пераганяюць аўдыторыю ў больш аплатныя сацыяльныя сеткі - Instagram, Telegram - і ўжо там працуюць.

Я ведаю некалькі даволі буйных блогераў, якім беларускія брэнды плацяць добрыя грошы за рэкламныя інтэграцыі. Напрыклад, мая знаёмая, у якой дастаткова вялікая аўдыторыя, атрымлівала нешта блізу 1000 рублёў за некалькі відэа. Ёсць знаёмыя, якія зарабляюць і 8 тысяч рублёў, і болей.

Агулам нейкую пэўную суму, колькі зарабляюць беларускія TikTok токеры, нельга назваць: усё залежыць, вядома, ад аўдыторыі, ад таго, як ты ў прынцыпе хочаш зарабляць у сацсетках і ці ставіш наогул на гэтым фокус.

На самай справе TikTok - гэта проста інструмент для прасоўвання. У асноўным блогеры, як я і казаў, зарабляюць у Instagram, Telegram ці на продажы сваіх прадуктаў.