Чаму ацяпляльны калапс у Расеі здарыўся менавіта цяпер

Губернатар Маскоўскай вобласці не вярнуўся з запою?

Чаму ацяпляльны калапс у Расеі здарыўся менавіта зараз? Пра гэта сайт Charter97.org пагаварыў з вядомым украінскім палітолагам, кіраўніком Цэнтра прыкладных палітычных даследаванняў «Пента» Уладзімірам Фесенкам:

- Фармальна гэтаму спрыяюць моцныя маразы. Гэта вонкавы штуршок, які выявіў праблему. Так бывала і раней, але зараз гэта выявілася ў масавым парадку.

У большасці расейскіх буйных гарадоў, такіх урбанізаваных рэгіёнах, як Падмаскоўе, дзе жывуць мільёны людзей, камунальная інфраструктура засталася яшчэ савецкай. Нагрузкі на старую камунальную структуру, на цепласеткі стала значна большай, а сетка засталася ранейшай. Гэты разрыў рана ці позна павінен быў спрацаваць.

Памятаю, што яшчэ больш за 20 гадоў таму, у 2002 годзе, маскоўскія паліттэхнолагі заявілі аб тым, што іх горад чакае інфраструктурны крызіс у 2009-ым годзе. Яны мелі на ўвазе крызіс савецкай інфраструктуры. Гэта значыць, яны прагназавалі, што савецкая інфраструктура ў 2009 годзе пачне выходзіць з ладу, а цяпер ужо 2024-ы.

Акрамя таго, дадатковым фактарам, які працуе на правакаванне гэтага крызісу, з'яўляецца вайна. Большая частка расейскіх рэсурсаў зараз ідзе на вайну супраць Украіны. Вайна фінансуецца, а камунальнымі інфраструктурамі не займаюцца, іх не мадэрнізуюць.

Яшчэ адну базавую прычыну назаву – аўтарытарны рэжым. У аўтарытарным рэжыме ўлады канцэнтруюцца на такіх канкрэтных сітуацыях, калі трэба кансалідаваць рэсурсы, запусціць адміністрацыйную машыну. Вось войнамі (хоць і абмежаваную колькасць часу) аўтарытарныя рэжымы могуць займацца. Хоць, як паказвае практыка, у выніку таксама церпяць крах.

З бягучымі ж сацыяльнымі праблемамі аўтарытарныя рэжымы спраўляюцца вельмі дрэнна. Гэта выяўлялася і ў СССР, і ў сучаснай Расеі. Значная частка расейцаў дагэталь жыве ва ўмовах 19-га стагоддзя.

Аўтарытарныя начальнікі проста пускаюць пыл у вочы. Яны зарабляюць на карупцыі, крадзяжах і крадуць якраз з камунальных грошай. Часцей за ўсё іх не хвалюе рэальная сітуацыя з насельніцтвам. Іх непакоіць, што скажа галоўны начальнік – Пуцін.

У Падмаскоўі, між іншым, таксама захавалася класічная сітуацыя з аўтарытарнымі рэжымамі. Губернатар Маскоўскай вобласці Андрэй Варабʼёў на Новы год паехаў (відаць, з усім сваім асяроддзем) на адпачынак далёка за межы Расеі. Яго своечасова не паінфармавалі, а далей ужо чыста расейская сітуацыя – на Новы год усе бухалі. Пра гэта пішуць і самі расейскія крыніцы.

Тыповая расейская сітуацыя – сышлі ў загул і забыліся, што ёсць рэальныя праблемы. Калі ж пачаліся крызісныя сітуацыі, то на выхад з запою спатрэбіўся час.

Як ні дзіўна, нават перадвыбарная кампанія Пуціна не адыграла тут галоўную ролю. Відаць, паліттэхнолагі Крамля ўбачылі, што зараз размова ідзе ўжо не пра дэфіцыт яек, як летась, а пра камунальныя праблемы.

Як цяпер сумна жартуюць ужо ў самой Расеі, «генерал Мароз», які быў вядомым хаўруснікам РФ, ударыў па расейскіх тылах. Ён пачаў замарожваць не ЕЗ, а адданых Пуціну расейцаў.