NYT: ХАМАС планаваў напасці на Ізраіль разам з «Хезбалой» і Іранам

Сталі вядомыя пратаколы 10 сакрэтных нарадаў тэрарыстаў.

Лідары ХАМАС збіраліся атакаваць Ізраіль у 2022 годзе, але адклалі планы, спрабуючы заручыцца падтрымкай ліванскай групоўкі «Хезбала» і Ірана, паведамляе The New York Times, спасылаючыся на звесткі пратаколаў нарадаў кіраўніцтва палестынскай групоўкі.

Дакументы складаюцца з пратаколаў 10 сакрэтных нарадаў у планаванні невялікай групы палітычных і ваенных лідараў ХАМАС напярэдадні атакі 7 кастрычніка 2023 года. Першапачаткова ХАМАС планаваў ажыццявіць атаку, якую ён назваў «вялікім праектам», восенню 2022 года, але адклаў планы, спрабуючы заручыцца падтрымкай Ірана і «Хезбалы».

Сярод аргументаў для «пераходу да стратэгічнай бітвы» кіраўніцтва ХАМАС прывяло «ўнутраную сітуацыю» ў Ізраілі. Гаворка ідзе пра масавыя пратэсты праз судовую рэформу прэм'ер-міністра Ізраіля Біньяміна Нетаньяху.

У ліпені 2023 года ХАМАС скіраваў чыноўніка ў Ліван, дзе ён сустрэўся з высокапастаўленым іранскім камандзірам і папрасіў дапамогі ў нанясенні ўдараў па адчувальных аб'ектах у пачатку атакі. Іранскі вайсковец паведаміў, што Тэгеран і «Хезбала» гатовыя падтрымаць ХАМАС, але ім трэба больш часу для падрыхтоўкі такіх удараў.

Выданне зазначае, што ў пратаколах не сказана, наколькі падрабязны план ХАМАС прапанаваў сваім хаўруснікам. Групоўка таксама збіралася абмеркаваць напад на Ізраіль з тагачасным лідарам «Хезбалы» Хасанам Насралом, але не ўдакладняецца, ці адбылася гэтая сустрэча.

ХАМАС быў упэўнены ў агульнай падтрымцы сваіх хаўруснікаў, але прыйшоў да высновы, што яму, магчыма, давядзецца дзейнічаць без іх поўнага ўдзелу – збольшага для таго, каб перашкодзіць Ізраілю разгарнуць перадавую новую СПА да таго, як адбудзецца атака, удакладняе The New York Times.

Паводле звестак выдання, ХАМАС спецыяльна ўнікаў буйных сутыкненняў з Ізраілем з 2021 года, каб максімальна ўзмацніць эфект нечаканасці падчас нападу 7 кастрычніка мінулага года. Пастанова пра напад таксама была абумоўленая жаданнем ХАМАС сарваць намаганні ў нармалізацыі стасункаў паміж Ізраілем і Саудаўскай Аравіяй і спробамі ізраільскіх сілаў узмацніць кантроль над комплексам мячэці Аль-Акса ў Іерусаліме.

Як адзначае The New York Times, пратаколы былі знойдзеныя на кампутары, знойдзеным у канцы студзеня ізраільскімі салдатамі, калі яны абшуквалі падземны камандны цэнтр групоўкі на поўдні Газы. Частку дакументаў рэдакцыя праверыла самастойна, супаставіўшы іх інфармацыю з падзеямі. Іншую частку газета прапанавала экспертам, знаёмым з дзейнасцю ХАМАС, а таксама былому сябру ваеннага крыла арганізацыі.

7 кастрычніка 2023 года Ізраіль зазнаў беспрэцэдэнтны ракетны напад з боку ХАМАС з сектара Газа. Пасля гэтага баевікі праніклі ў памежныя раёны, адкрылі агонь па вайскоўцах і цывільных асобах і ўзялі ў закладнікі больш за 250 чалавек. У выніку атакі загінула блізу 1,2 тысячы ізраіліцянаў і грамадзянаў іншых краінаў. У адказ на агрэсію Войска абароны Ізраіля (ЦАХАЛ) пачало аперацыю «Жалезныя мячы» ў сектары Газа.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com