Беларуска расказала, як выглядаюць школьныя абеды ў Польшчы

Параўнайце з беларускімі.

Чытачка сайта Charter97.org, якая жыве ў Польшчы, распавяла пра харчаванне ў школьных сталовых у гэтай краіне:

Я даўно заўважыла, што дачка пасля школы не хоча дома абедаць. Маўляў, яна паабедала ў школе. Сёння я падрабязна распытала яе, што ж яны ядуць у школе, ці не халодныя школьныя стравы.

Дачка неяк з недаверам пасміхнулася і сказала: “Мама, як яны могуць быць халодныя, гэта ж прыгатаваныя стравы!” Я запярэчыла, што калі доўга пастаіць на стале, то і ачахне.

Але на сталах нічога, акрамя сурвэтак, не стаіць. Кожны клас па чарзе падыходзіць да пункту выдачы і бярэ гарачую страву. Сапраўды гарачую! Тут вялікая разнастайнасць каш з курынымі ды рыбнымі нагетсамі, рознымі мяснымі поліўкамі ды мяснымі бургерамі, аладак, варэнікаў.

За асобным сталом стаіць вялікі рондаль з салатай, якую кожны бярэ столькі, колькі можа ці хоча з’есці. Тут жа стаіць і рондаль з супам. Кожнае дзіця налівае яго самое, калі яму гэты суп смачны. Мая дачка не есць памідоравы суп. Я і не намагаю. Бо сама яго ніколі не гатую. Але заўсёды налівае сабе боршч, суп-пюрэ з брокалі, суп з макаронай, капусту. Налівай і еж, колькі хочацца!

Салаты падаюць з таматаў, агуркоў, з перцу, буракоў, морквы. Стэфка не есць буракі, ну то і няхай. Сёння салаты не было, але ўсім выдалі па вялікім балгарскім перцы.

Садавіну даюць 3 разы на тыдзень. У верасні гэта былі персікі, нектарыны, грушы, слівы, яблыкі, кавалачкі кавуна. Зімой пераважаюць бананы, апельсіны, мандарыны, яблыкі. Кожны таксама падыходзіць і бярэ сабе. У тыя дні, калі садавіны ці гародніны няма, даюць пладовае пюрэ або печыва. На маё пытанне, ці можа нехта ўзяць два, а некаму не выстарчыць, дачка адказала, што зазвычай бывае наадварот! Палякі не дужа ахвотна ядуць садавіну ды гародніну.

На дні перад святамі могуць выдаць і па 100-грамовай шакаладцы, пачак мешанкі з арэхаў або яблычных чыпсаў, часам у перадсвяточныя дні гатуюць бургеры і хот-догі.

Таму калі Стэфка прыходзіць дадому не галодная, я не прымушаю яе сядаць есці. Колькі каштуе полудзень у нашай школе, спытаеце вы. Мне падаецца, няшмат. 5 злотых за дзень, або калі пералічыць на беларускія грошы — дзесьці 3,70 рубля. Для настаўнікаў абеды каштуюць 7,50 злотых, але і гэта, мне падаецца, прымальная цана.

Магчыма, цэны і якасць абедаў у розных школах адрозніваюцца, але мы сваім харчаваннем вельмі задаволеныя.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com