«Гэтыя грошы так і не знайшліся»
7- 17.10.2024, 15:25
- 6,506
Пасля ператрусаў у беларусаў знікаюць рэчы - грошы, парфума і нават дыскі для гульнявой прыстаўкі.
"Медыязона" сабрала гісторыі беларусаў, у якіх пасля ператрусаў дома знікалі розныя рэчы: грошы, упрыгожванні, алкаголь і дыскі для Playstation. Імёны некаторых герояў зменены.
Грошы
Падчас вобшуку ў кватэры Івана сілавікі канфіскавалі тэхніку і грошы. Пасля частка сродкаў пайшла на судовыя выплаты. Калі родным Івана аддавалі пакінутыя грошы, яны недалічыліся блізу 2000 даляраў.
«На якім этапе грошы зніклі, я не магу сказаць, я быў у калоніі, - распавядаў Іван. - Сума сур'ёзная. Але калі ты знаходзішся там, ты баішся за родных. А калі я вызваліўся, не хацеў прыцягваць увагу. Ну, хлопцы, на вашым сумленні няхай будзе. Чорт яго ведае. Пайду ў міліцыю качаць правы?.. Не дай бог, ізноў крымінальная справа. Ну, забралі дык забралі. Вам, мусіць, патрэбней было».
У сакавіку 2024 года актывіст і хрысціянскі прапаведнік Сяргей Мельянец прыйшоў у суд над журналістам Ігарам Карнеем. Яго затрымалі, а пры аглядзе заплечніка склалі вопіс, у які сярод іншага запісалі пяць рублёў. Са слоў Мельянца, насамрэч пры ім было 300 рублёў - 295 рублёў «зніклі».
У 2020 годзе грошы зніклі і ў берасцейца Дзмітрыя Панько.
«Падчас ператрусу забралі амаль 500 рублёў. Гэта была каса, якую я мусіў адвезці на працу. Спыталі ў мяне: „Табе што, за мітынгі заплацілі?“ Я пачаў тлумачыць, што гэта за грошы. Яны мне адразу ў адказ: „Заткніся, на **й“. Адзін з супрацоўнікаў забраў грошы і паклаў іх сабе ў барсетку”, - успамінаў Панько.
У пастарунку ён спытаў у міліцыянта, ці вернуць яму грошы. Той у адказ спытаў: "Якія грошы?" Панько дзеля ўласнай бяспекі больш пытанняў не задаваў. Яго прысудзілі да трох гадоў калоніі паводле справы аб масавых беспарадках (ч. 2 арт. 293 КК). Ён поўнасцю адбыў прызначаны тэрмін і з'ехаў з Беларусі.
Пенсіянера Аляксея затрымалі ўлетку 2022 года на данос суседа, які раней працаваў у міліцыі. На лецішча прыехалі супрацоўнікі АМАП і ГУБАЗіК. Там у гаражы Аляксей захоўваў грошы на "чорны дзень" ды іншыя каштоўнасці. Ён сцвярджае, што супрацоўнік, які аглядаў сейф, паказаў сведкам толькі стары крыжык і пярсцёнак, але не 20 000 даляраў, якія таксама там ляжалі.
«Гэта значыць згодна з вопісам іх як быццам і не было. Пасля гэтыя грошы так і не знайшліся», - сцвярджае пенсіянер.
Мужчыну прысудзілі да "хатняй хіміі", ён з'ехаў з Беларусі.
Парфума, упрыгожванні і дыскі для Playstation
Палітвязень Кастусь Карней пасля вызвалення даведаўся, што з яго кватэры зніклі некалькі дыскаў з гульнямі для кансолі PlayStation, бацькаў гадзіннік, а ў яго дзяўчыны парфума — напалову выкарыстаны флакон Сhanel № 5. Карнея прысудзілі да паўтара года «хатняй хіміі» паводле артыкуле пра грубае паруўэнне парадку (арт. 342 КК), і ён пакінуў Беларусь.
Пра знікненне каштоўнасцяў падчас ператрусу расказваў у судзе і анархіст Мікалай Дзядок, прысуджаны ў 2021 годзе да пяці гадоў калоніі. У вопісе канфіскаваных рэчаў ён не знайшоў некаторых прадметаў.
«Мяркую, што камеру, штатыў, гадзіннік і тысячу рублёў скралі супрацоўнікі ГУБАЗіКу, скарыстаўшыся тым, што я большую частку часу нічога не бачыў, бо ляжаў тварам у падлогу. Па-другое, быў дэзарыентаваны і не мог уважліва чытаць спіс канфіскаванага», - казаў Дзядок.
Пра знікненне рэчаў расказвала і спявачка Мерыем Герасіменка. Ператрус у яе кватэры прайшоў, калі яна ўжо была ў СІЗА. Пасля вызвалення яна знайшла ў кватэры толькі пустыя каробкі ад залатых завушніц і кулонаў, духаў і элітнага алкаголю.
Калі грошы забіраюць без пратакола, то потым цяжка будзе даказаць, што забралі і не аддалі
Праваабаронца Леанід Судаленка раіць кантраляваць усё, што робяць сілавікі падчас ператрусу, патрабаваць копію пратаколу, вычытваць вопіс перад тым, як ставіць подпіс і ўносіць свае пярэчанні, калі гэта неабходна.
Калі праваабаронцу затрымлівалі паводле крымінальнай справы, у яго пры сабе было 800 рублёў, якія былі ўнесены ў вопіс. Пасля вызвалення з калоніі ён атрымаў гэтыя грошы назад.
«Звяртацца трэба да тых, хто забраў [грошы]. Яны ж даюць адпаведную паперу. Яны і накіравалі [мяне] ў фінаддзел гарвыканкаму, куды перадалі на захаванне грошы», - распавядае ён.
Да гісторый, калі міліцыянты забіралі грошы, Судаленка ставіцца з падазрэннем.
«Грошы не могуць знікнуць. Забралі адзін рубель - ён запісаны ў пратаколе. Калі забіраюць без пратакола, то потым цяжка будзе даказаць, што забралі і не аддалі».
У выпадку, калі да знікнення рэчаў маюць дачыненне супрацоўнікі сілавых ведамстваў, іх дзеянні могуць быць кваліфікаваны як крадзеж шляхам злоўжывання службовымі паўнамоцтвамі, злоўжыванне ўладай або службовымі паўнамоцтвамі або перавышэнне службовых паўнамоцтваў.