Куба патанула ў цемры
20- 21.10.2024, 15:01
- 10,096
Як выглядае поўны блэкаўт выспы.
На Кубе супрацоўнікі экстранных службаў пакуль не могуць аднавіць энэргасістэму краіны, якая выйшла з ладу 18 кастрычніка і пагрузіла востраў у блэкаўт, паведамляе The Guardian.
«Працэс паўторнага падключэння энэргетычнай сістэмы застаецца складаным», - паведамілі ў кубінскім Міністэрстве энэргетыкі.
Паводле інфармацыі журналістаў, рамонтныя брыгады тройчы пацярпелі няўдачу, спрабуючы перазапусціць энэргетычную сістэму. У Мінэнэргетыкі адзначалі, што чарговыя непаладкі, якія не дазволілі скончыць блэкаўт, здарыліся ў падсістэме, у якую ўваходзіць сталіца Кубы — Гавана.
Яшчэ 18 кастрычніка ўлады Кубы адправілі па дамах дзяржслужбоўцаў з ведамстваў не першараднай важнасці, а таксама скасавалі заняткі ў школах праз аварыю.
Як пішуць журналісты, наступствы блэкаўту пагаршаюцца тым, што ў кубінскага ўрада праблемы з фінансамі. Адключэнні электраэнэргіі працягласцю да 20 гадзін на дзень сталі звычайнай з'явай па ўсім востраве, бо дзяржава з усіх сіл спрабуе закупіць дастаткова паліва на сусветных рынках для сваіх пяці асноўных цеплаэлектрастанцый.