«Для мяне гэта выглядала даволі смешна»
8- 23.10.2024, 10:33
- 10,138
Беларусы на мяжы сутыкнуліся з новай праверкай.
«Нашай Ніве» стала вядома, што на мяжы Беларусі з Еўразвязам беларускія спецслужбы часам выклікаюць на асабістую гутарку новую катэгорыю людзей — бацькоў, чые дзеці жывуць за мяжой.
Сітуацыя адбылася нядаўна на беларуска-польскай мяжы, калі турыстычны аўтобус вяртаўся з экскурсійнай паездкі. Суразмоўца выдання распавёў, што сярод падарожнікаў не было людзей, якія раней прыцягваліся паводле пратэстных артыкулаў, — гэта высвятлялі яшчэ перад пад'ездам да мяжы.
Аднак, нягледзячы на гэта, беларускія спецслужбы выклікалі "на размову" некалькіх чалавек з аўтобуса. Як высветлілася, аб'ядноўвала іх адно - дзеці, якія жывуць за мяжой (суразмоўца адзначыў, што людзей, якіх можна аднесці да такой катэгорыі, у аўтобусе было больш, але выклікалі далёка не ўсіх з іх).
Адзін з пасажыраў расказаў, што ў яго пыталіся, чаму яго дзіця не жыве на радзіме, чаму не хоча тут працаваць. Настойліва прапанавалі патэлефанаваць і папрасіць вярнуцца жыць у Беларусь.
«Для мяне гэта выглядала даволі смешна, бо хто сур'ёзна верыць, што пасля такога званка дзеці кінуць уладкаванае жыццё на новым месцы (жыллё, працу, сваіх дзяцей вырвуць са школы) і паспяшаюцца ў Беларусь, бо бацькі папрасілі? Мы ж гаворым пра дарослых людзей са сваім жыццём і меркаваннем», - падзяліўся суразмоўца.
У выніку ўсіх выкліканых на размову адпусцілі.