У Берасці за «палітыку» судзілі адразу шэсць чалавек
3- 28.10.2024, 18:55
- 6,764
Названыя прозвішчы і тэрміны.
Суд Ленінскага раёна Берасця 25 кастрычніка вынес чарговы масавы прыгавор за ўдзел у акцыі пратэсту 10 жніўня 2020 года, піша «Берасцейская Вясна».
Паводле звестак праваабаронцаў, Андрэя Карчага, Ірыну Сароку, Таісію Літвінаву, Сяргея Пятручыка, Дзмітрыя Буланава і Валерыя Мароза абвінавачвалі на падставе ч.1 арт.342 КК (Актыўны ўдзел у дзеяннях, якія груба парушаюць грамадскі парадак).
Суд прызнаў іх вінаватымі і прыгаварыў:
• Андрэя Карчага, Сяргея Пятручыка, Дзмітрыя Буланава, Валерыя Мароза да 1,5 года калоніі агульнага рэжыму кожнага;
• Таісію Літвінаву да 1,5 года пазбаўлення волі. Па сукупнасці з судзімасцю паводле арт.328 КК яна атрымала 11 гадоў калоніі і штраф;
• Ірыну Сароку да двух гадоў «хатняй хіміі».
Паводле версіі абвінавачання, 10 жніўня 2020 года фігуранты справы ў Берасці «выкрыквалі лозунгі, дэманстравалі палотны бел-чырвона-белага колеру, наўмысна перашкаджалі руху транспартных сродкаў і нармальнаму функцыянаванню прадпрыемстваў». Гэтым яны нібыта груба парушалі грамадскі парадак.
Таісія Літвінава, паводле звестак “Берасцейскай Вясны”, фігуравала ў відэа сілавікоў у жніўні 2024 года, а пра шахматыста Дзмітрыя Буланава сілавікі публікавалі відэа ў ліпені 2023 года. Тады мужчыну прымусілі на камеру прызнавацца ва ўдзеле ў пратэстах у 2020 годзе. Мужчына казаў, што з'яўляецца прафесійным шахматыстам, уваходзіць у 30 найлепшых шахматыстаў Беларусі.