Наталля Радзіна: Лукашэнка - старая трухлявая калода

Дыктатар не мае пяці гадоў.

У эфіры «Радыё Рацыя» галоўная рэдактарка сайта Charter97.org Наталля Радзіна выказала меркаванне, што будучыя «выбары» - апошнія для Лукашэнкі. Прыводзім стэнаграму размовы:

- Прэзідэнцкія «выбары» адбудуцца раней, чым усе думалі. Ужо праз тры месяцы - 26 студзеня. Чаму так моцна спяшаецца Лукашэнка?

- Лукашэнка вельмі спяшаецца, разумеючы, што пазней у яго можа і не быць шанцаў удзельнічаць у гэтых прэзідэнцкіх «выбарах». Па-першае, мы бачым, што стан здароўя дыктатара - крытычны.

З’явілася інфармацыя, што праз цукроы дыябет яму нават ампутавалі пальцы на назе. Мы бачым, як ён кульгае на кожнай сустрэчы. І пакуль ён яшчэ стаіць на нагах, відавочна, што ён хацеў бы паўдзельнічаць у выбарах. Ён сябе не ўяўляе без улады. Але назваць гэта «выбарамі» немагчыма. Вядома, гэта проста фарс.

Размову можна праслухаць у аўдыёфармаце

- Чуткі пра дрэннае здароўе Лукашэнкі ходзяць ужо год-два-тры...

- Пагаджуся, яны ходзяць не год-два-тры, а ўжо шмат гадоў. Але зараз яму ўжо 70, і мы бачым, што насамрэч Лукашэнка не ў стане нават прайсці некалькі метраў на парадзе ў Маскве, як гэта было сёлета 9 траўня. Ужо ўсім відавочна, што стан здароўя ў дыктатара вельмі кепскі.

- Эканоміка таксама не рухаецца да лепшага, а да горшага з кожным месяцам.

- Згодная з вамі, сітуацыя ў Беларусі вельмі цяжкая. І не толькі палітычная, але і эканамічная. Лукашэнка, па-першае, разумее, што сёння яго не падтрымлівае большасць насельніцтва. На выбарах 2020 года ён саступіў, і ад тых масавых рэпрэсій, якія абрынуліся на грамадства, любові да дыктатара не з'явілася.

Мы ведаем, што людзі, вядома, не могуць зараз адкрыта казаць пра сваю паіцыю, але яны ненавідзяць гэтую ўладу.

А эканамічная сітуацыя толькі пагаршаецца. Расея сёння не можа ў тых самых аб'ёмах фінансаваць беларускую дыктатуру. Бо сама вядзе вайну супраць Украіны, а таксама падтрымлівае тэрарыстычныя рэжымы па ўсім свеце. Цяпер ужо сама Расея стаіць на мяжы эканамічнага крызісу. Грошы ў Беларусь з Расеі ўжо не ідуць у ранейшым аб'ёме.

- Што рабіць беларусам 26 студзеня? Зянон Пазняк прапануе байкатаваць. Офіс Ціханоўскай заклікае галасаваць супраць усіх.

- Я мяркую, што гэтыя «выбары» трэба ігнараваць. Ні ў якім разе не ісці 26 студзеня на выбарчыя ўчасткі. Зразумела, што беларусаў будуць заганяць гвалтам. Будзе выкарыстаны адмінрэсурс, дзяржслужбоўцы будуць вымушаныя пайсці. Будзе і вялікі адсотак тых, хто прагаласуе датэрмінова - 35-40%. Так адбываецца на кожных сфальсіфікаваных Лукашэнкам «выбарах».

Але ў дзень выбараў уладам вельмі цяжка загнаць людзей на выбарчыя ўчасткі. Таму тыя, хто не залежыць ад дзяржавы, не з'яўляюцца дзяржслужбоўцам, могуць не ісці, а тыя, хто залежыць - «захварэць» або ўзяць лісток непрацаздальнасці.

Трэба 26 студзеня паказаць пустыя ўчасткі. Гэта будзе вельмі красамоўна казаць пра тое, што беларусы не згодныя з дыктатурай.

Тое, што прапануе офіс Ціханоўскай, уважаю за працу на ўладу. Ні ў якім разе нельга ісці і галасаваць супраць усіх. Бо гэта забяспечыць прыход. Прапаганда будзе паказваць поўныя людзей участкі і казаць, маўляў, «усе гэтыя людзі прыйшлі, каб прагаласаваць за Лукашэнку».

Так, яны намалююць вынік, але калі ўчасткі будуць пустыя, гэта пакажа беларускі пратэст. Пакажа, што беларусы не за дыктатуру. Гэта можна і трэба зрабіць 26 студзеня.

— Назіраючы за тым, што адбываецца ў Беларусі, магу ўявіць, што напярэдадні гэтага спектакля можа стацца, што няўдзел у «выбарах» — гэта экстрэмізм, тэрарызм, здрада.

- Калі будуць такія ўмовы, то можна будзе распрацаваць іншую стратэгію, але на сёння, мне здаецца, што самы добры варыянт - ігнараваць гэты фарс.

- І чакаць? Чаго?

- Я ўпэўненая, што гэта апошнія «выбары» Лукашэнкі. Гэта ягоны апошні спектакль. Паверце, у Лукашэнкі проста няма пяці гадоў, каб дачакацца наступных выбараў. Сітуацыя вельмі складаная, і яна звязаная з вайной ва Украіне. Відавочна, што цягам гэтых гадоў нас чакаюць вялікія перамены.

Расея не можа бясконца весці гэтую вайну, у яе заканчваюцца рэсурсы. Сканчаюцца яны і ў рэжыму Лукашэнкі. Заходнія санкцыі, уведзеныя пасля 2020 года, працуюць, рэжым нясе вялікія страты праз забарону экспарту беларускіх нафтапрадуктаў, калійных і азотных угнаенняў. Усё гэта моцна б'е па рэжыме.

Ізаляцыя заганяе Беларусь ва ўсё большыя страты. Я бачу па настроях не толькі простых людзей, якія ненавідзяць уладу, але і наменклатуры, што яны незадаволеныя, разумеючы, што існая сітуацыя ў Беларусі - абсалютны тупік, і з яго трэба выходзіць.

Улада Лукашэнкі сёння пагражае Беларусі стратай незалежнасці. Дыктатар настолькі залежны ад Масквы, што наступным крокам з боку Крамля можна можа быць правядзенне нейкага «рэферэндуму» аб далучэнні Беларусі да РФ.

Гэтага не жадае не толькі беларускі народ, але і наменклатура. Яна разумее, што згубіць у гэтым выпадку ўсё. Я ведаю, што яны ў разгубленым стане, думаюць пра тое, што нешта трэба мяняць. А дыктатар - не вечны, гэта старая трухлявая калода. Яны задумваюцца: а што пасля яго?

- Мы часта чуем, што Расея распадзецца і толькі тады будзе новая Беларусь. Але ці не занадта мы верым у развал Расеі? Узнікае пытанне, а каму ж гэта патрэбна?

Мы бачым, як выглядае падтрымка Украіны ў вайне з Расеяй. Здаецца яна ёсць, але такая, каб, не дай Бог, не перамагла Украіна, бо пройгрыш Расеі можа быць пачаткам яе канца. А каму гэта патрэбна? Каму ядзерную зброю? А ўсе гэтыя радовішчы нафты і газу? Хто гэтым скарыстаецца? Можа, Кітай?

- Магу сказаць, што на Захадзе ніхто не хацеў і распаду СССР. Так, была «халодная вайна», канкурэнцыя паміж ЗША і Савецкім Саюзам, але, падкрэслю, насамрэч развалу СССР у ЗША не хацелі.

Цяпер яны сапраўды таксама не ведаюць, што будзе. Але развал СССР здарыўся, і тое самае будзе з Расеяй. Я веру ў тое, што распад РФ немінучы. Расея, пачаўшы вайну супраць Украіны, адкрыла скрыню Пандоры.

- Але распаду СССР хацелі ўнутры саюза: краіны Балтыі, Украіна, Казахстан, думаю і Беларусь. Цяпер жа сітуацыя больш герметычная...

- Справа ў тым, што тады СССР не распаўся да канца. Цяпер, праз 30 гадоў, мы назіраем гэты працэс дараспаду Савецкага Саюза.

Тады Расейская імперыя захавала ўплыў на постсавецкай прасторы і многія нацыянальныя рэспублікі не змаглі выйсці з яе складу. Дыктатуры, якія ўзніклі ў Беларусі, Азербайджане, Арменіі, Казахстане, падтрымліваліся расейскімі грашыма.

Сёння ж грошы ў Расеі заканчваюцца, як я ўжо казала, занадта шмат іх ідзе на вайну. Цяпер Пуцін ваюе ўжо з усім светам.

Мы бачым, якая цяжкая сітуацыя ў яе эканоміцы, якая практычна пастаўленая на вайсковыя рэйкі. Яна не вытрымае, як не вытрымаў СССР нават вайны ў Афганістане. Так не вытрымае і сённяшняя Расея вайны супраць Украіны.

— Пад канец нашай размовы крыху гумару. Хоць, не ведаю, ці добры гэта жарт. А чаму б не прагаласаваць за спарынг-партнёраў Лукашэні. Збіраецца паўдзельнічаць у гэтым студзеньскім спектаклі Гайдукевіч. Дык давайце ўсе за Гайдукевіча, а там няхай яны паміж сабой разбіраюцца.

Лукашэнка дрэнна пераносіць пройгрышы. Зразумела, што ўладу ён не аддасць, можа Гайдукевіча пасадзіць. Але ці вытрымае яго сэрца і галава?

- Ні ў якім разе нельга гэтага рабіць. Гэта зноў будзе той самы прыход на «выбарах», які чакае Лукашэнка. Таму ён гэтых спойлераў і запускае. Не будзе ўжо сітуацыі 2020-га года, калі людзі таксама прагаласавалі за выпадковага чалавека - Святлану Ціханоўскую, якая ніколі не была ў апазіцыі і палітыцы.

Але тады апазіцыя рыхтавала пратэсты, і гэта было галоўнае. Ніхто не рыхтуе пратэсты пасля гэтых «выбараў», калі вы будзеце галасаваць за спойлераў, то будзеце працаваць на рэжым. Таму толькі ігнор гэтага фарсу.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com